राम नारायण पंडित, सिरहा, ०७ मंसिर । सिरहा र धनुषाको सिमाना भएर वग्ने कमला नदीमा सूर्योदयसँगै आज हजारौँ नव धामीझाँक्री वोक्सावोक्सी पवित्र जलमा डुबुल्की लगाए । हजारौ स्त्री पुरुष दुवैपट्टिका नदीका किनारमा भगता (देउता) खेलिरहेका थिए भने प्रत्येक भगतासँग समुहमा रहेका  ब्यक्तिहरुले भगतालाई प्रश्न गर्नुको साथै गीत (भगैत) गाउनमा व्यस्त रहेका थिए ।

 

आज बिहानै देखि कमला नदीको दृश्य रोमाञ्चक देखिन्थ्यो । पहेँलो धोती र सारीमा सजिएका नयाँ सिकारु धामीझाँक्रीहरु हातमा बेतको छडी घुमाउँदै कर्कश स्वरमा चिच्याउँदै थिए । तिनीहरु आफ्नो तन्त्रमन्त्रलाई सिद्ध गर्नका लागि आज पुर्णिमाको अबसरमा कमला नदिमा डुबुल्की मार्न आएका थिए । नदीमा धामीझाँक्री आफ्नो तन्त्रमन्त्र सिद्ध गर्न र बोक्साबोक्सी तथा भूतप्रेतबाट पीडितहरुले भय उत्पन्न हुने गरी कर्कश स्वरमा चिच्याउँदै गोसाई  (देउता) खेल्दै थिए । 

 

आफनो शरीरमा वास बस्न आएका देवतालाई पवित्र पार्न तथा शरीरमा देवीदेवताको स्थायीवासका लागि कात्र्तिक पूर्णिमा स्नान गर्ने ती नवधामीझाँक्री वोक्साबोक्सी स्नानका लागि आउँछन । करिब ८ बर्षदेखि यसरी नै पुुर्णिमाको स्नान गर्छु, स्नानले मनमा शान्ति, घरपरिबार सुखि राख्नुको साथै देबिदेबताले रक्षा गर्छन्, भुतप्रेत लाग्ने ब्यक्तिको स्थानले निको हुने र दुखकष्ट कमलामा बग्ने मान्यता रहेको झाक्री झबु गोईतको भनाई रहेको छ । 

 

आजको दिन स्नान गर्नाले देबिदेबताको बन्धन हुन्छन, घरपरिबार, संतान सुखि रहन्छन र भुतप्रेत निको हुने कात्र्तिक पूर्णिमाका दिन कमला गंगा लगायतका पवित्र नदीमा नयाँ भगता जसको जीउमाथि प्रथम पटक देउताको बास स्थायी हुने र भगताको गुण तथा तन्त्रशक्ति चल्ने विश्वास धामीझाँक्रीको छ । तन्त्रशास्त्र अनुसार तन्त्रसिद्धिका लागि कात्तिक पूर्णिमाका किन पूर्णहुति दिँदा तन्त्रविधा सिद्ध हुने मान्यता रहेको अर्का झाँक्री जगरनाथ साहले बताए । 

 

विजया दशमीको आगमनसँगै धामीझाँक्री बोक्साबोक्सी सक्रिय हुन्छन् । आश्विन अमावस्यालाई तन्त्र सिद्धिका लागि सर्वाेत्तम मानिन्छ । उनीहरुले देवीदेवताको बास स्थायी होस् भनेर आ–आफनो घरबाट आहुत बोकेर कात्र्तिक पूर्णिमाको विहान कमला नदी र अन्य पवित्र नदीमा स्नान गर्छन । 

सिरहाको साथै, महोत्तरी, धनुषा, सर्लाही, सप्तरी, बारा,  पर्सा, सुनसरी, मोरङ र सिमाबर्ती भारतबाट हजारौ लावालस्करका साथ काम्दै उफ्रदै घण्टौ–घण्टाको बाटो पैदल गई स्थान र तन्त्रमन्त्र गरेको दृश्य देखिन्थ्यो । 

 

राम नारायण पंडित, ०७ मंसिर । पूर्वपश्चिम राजमार्ग अन्तर्गत सिरहाको कर्जन्हा नगरपालिका–२ स्थित कमला पुल नजिकै भएको बस दुर्घटनामा परी घाइते मध्ये थप दुईको मृत्यु भएको छ । योसँगै सो दुर्घटनामा परी मृत्यु हुनेको सङ्ख्या तीन पुगेको छ । आज बिहान घाइते मध्ये सर्लाहीको हरिपुर नगरपालिका–९ निवासी ६५ वर्षीय रामप्रित साह र सर्लाहीकै कविलाशी नगरपालिका ९ निवासी ३५ वर्षीय राजेन्द्र चौधरीको मृत्यु भएको मिर्चैया इलाका प्रहरी कार्यालयका प्रहरी नायब उपरीक्षक सुकदेव खनालले जानकारी दिए । साहको धरानस्थित विपी कोइराला स्वास्थ्य विज्ञान प्रतिष्ठानमा र चौधरीको विराटनगरस्थित न्यूरो अस्पतालमा उपचारका क्रममा मृत्यु भएको उनले बताए । 

उक्त घटनामा यसअघि सर्लाहीको हरिपुर नगरपालिका–९ निवासी ४५ वर्षीय जगदीश ठाकुरको मृत्यु भएको थियो । सिरहा र धनुषाको सिमानामा पर्ने कमला नदीमा पूर्णिमा स्नान अर्थात् भूतमेला भर्न सर्लाहीबाट आएका तीर्थालु चढेको ना४ख ४८२५ नंको बस र पूर्वबाट पश्चिमतर्फ जाँदै गरेको ना५ख ३९४० नंको मिनी ट्रक एकापसमा ठोक्किँदा दुर्घटना भएको थियो । सो दुर्घटनामा परी ४५ भन्दा बढी यात्रु घाइते भएका थिए । घाइतेमध्ये गम्भीर अवस्था रहेका तीन जनालाई थप उपचारका लागि विपी कोइराला स्वास्थ्य विज्ञान प्रतिष्ठान धरान पठाइएको र अन्यको कर्जन्हास्थित फूलकुमारी महतो मेमोरियल अस्पतालमा उपचार भइरहेको प्रहरी नायब उपरीक्षक खनालले बताए ।

 

ट्रकका चालक प्रहरी नियन्त्रणमा रहेका छन् भने बसका चालक फरार रहेको उनले बताएका छन् । 

राम नारायण पंडित, ०७ मंसिर । सिरहामा तीर्थयात्री सवार बस दुर्घटना हुँदा एक जनाको मृत्यु भएको छ भने ४५ जना घाइते भएका छन । पूर्वपश्चिम राजमार्ग अन्तर्गत कर्जन्हा नगरपालिका बडा नं. २ स्थित कमला नदिको पुर्बी किनारमा विहिबार साँझ बस दुर्घटना हुँदा सर्लाही हरिपुर नगरपालिका बडा नं. ९ का ४५ वर्षीय जगदिश ठाकुरको मृत्यु भएको जिल्ला प्रहरी कार्यालय सिरहाका प्रहरी उपरिक्षक जीवन श्रेष्ठले जानकारी दिए । 

सिरहा र धनुषाको सीमानामा पर्ने कमला नदीमा पूर्णीमा स्नान अर्थात भुत मेला भर्न सर्लाहीबाट आएका तिर्थालु चढेको ना ४ ख ४८२५ नम्बरको बस र पूर्वबाट पश्चिमतर्फ जाँदै गरेको ना ५ ख ३९४० नम्बरको मिनि ट्रक एक आपसमा ठोक्किँदा दुर्घटना भएको ईलाका प्रहरी कार्यालय मिर्चैयाका प्रहरी नायब उपरिक्षक सुकदेब खनालले जनाएको छ । 

 

घाइतेमध्ये गम्भिर अवस्था रहेका ३ जनालाई थप उपचारका लागि बिपी कोईराला स्वास्थ्य विज्ञान प्रतिष्ठान धरान पठाईएको र अन्यको कर्जन्हा स्थित फुलकुमारी महतो मेमोरियल अस्पतालमा उपचार भईरहेको अस्थायी ट्राफिक प्रहरी पोष्ट मिर्चैयाका ईन्चार्ज मनोज चौधरीले जानकारी दिएका छन् ।

 

 

लहान, ६ मंसिर । मधेशको ऐतिहासिक घटनालाई मधेश आन्दोलनसँग जोडर निर्माण भइरहेको मिशन मधेश चलचित्र यत्तिबेला जनचासोको विषय बनेको छ । कात्तिक २७ गतेदेखि सुटिंग शुरु भएको यस चलचित्रमा मधेश आन्दोलनका वास्तविक अगुवा दिनेश्वर गुप्ता नायक र नायिका कसिस दहालको मुख्य भूमिका रहेको छ ।यो सँगै चलचित्रमा थप तीन सहनायक र नायिका रहेको छ भने मधेश आन्दोलनकै अर्का अगुवा आलम खान खलनायकको रुपमा भूमिका निर्वाह गर्दै आएको छ । दर्जनौ फिल्ममा निर्देशन गरिसकेका सुर्या साह निर्देशकको भूमिकामा सक्रिय रहेका छन् ।

सम्भवत मधेशी मैथली चलचित्रमा पहिलो पटक रेड क्यामराले सुटिंग भइरहेको मिशन मधेशको क्यामराम्यान विनोद सापकोटा रहनुभएका छन् । दिनाभद्री फिल्म प्रोडक्शन प्रालि लहानको प्रस्तुतीमा निर्माण भइरहेको सो फिल्मका निर्माता मुकेश कर्ण हुन् । मधेश आन्दोलनको उद्गम विन्दु अर्थात प्रदेश २ को फिल्म उद्योगको रुपमा अघि बढिरहेको लहानको सेरोफेरोमा यस चलचित्रको सुटिंग भइरहेको छ भने फाईट मास्टर प्रदीप खड्काले भारतको साउथ स्टाईलको फाईट दिएर मिशन मधेश चलचित्रलाई थप उर्जा दिइएको छ । मंसिरको अन्तिम सत्तामा सुटिंग सम्पन्न गर्ने तयारीमा जुटेको छ भने फागुनको पहिलो सत्ता प्रदर्शनमा ल्याउँने तयारी गरिरहेको निर्माता मुकेश कर्णले बताए ।

निर्माता कर्णले भने हिन्दी, नेपाली र भोजपुरीले प्रेमगाथामा आधारित फिल्म बजारमा ल्याइरहेको बेला हामीले मधेशको ऐतिहासिक र मधेश आन्दोलनसँग जोडेर फिल्म तयारीमा जुटेका छौ । यो फिल्म वृद्धदेखि बच्चासम्मले हेर्ने लायक बन्दैछन् । मुलत आफ्नो अधिकार आफ्ैले लिन सक्नुपर्छ जस्ता सवालहरुको चित्रण यस फिल्मका गरिएको छ । कथावस्तु तथा स्क्रीप्ट राईटर पत्रकार डिपी गुप्ता रहेको यस चलचित्रमा अधिकाँश दर्जनौ फिल्ममा काम गरिसकेका कलाकारहरु छन् । दूई दर्जनबढी नेपाली चलचित्रमा काम गरिसकेका आलम खानको सक्रिय भूमिका रहेको छ भने तीन चलचित्रमा काम गरिसकेकी कसिस दहाल मिशन मधेश फिल्मको चर्चित पात्रको रुमपा रहेको छ । चार फिल्म गरिरसकेका दिनेश्वर गुप्ता मुख्य नायकको रुपमा मिशन मधेशमा मारधाड एक्शन र अधिकारको लागि लड्ने पात्र हुन् ।

नायिका रेनुका कार्की, सुजित यादव, पुजा दास, तुलसा कोइराला, विरेन्द्र विरु, अरुण केसी, आरजि भिलेन, शिव यादव, राजकुमार राउत, भरत साह, अस्मा श्रेष्ठ, भारती गुप्ता, रवीन्द्र श्रेष्ठ, सुनिल साह, प्रदीप सिँह, रंजिता मण्डललगायत चार दर्जन कलाकारहरुले मिशन मधेश चलचित्रका पात्रहरु हुन ।