चैत्र ९  । केपी शर्मा ओली नेतृत्व सरकारले राष्ट्रिय जनावर गाई काट्न पाउने कानून ल्याउने प्रतिबद्धता जनाएको छ । प्रदेश ३ का उपसभामुख राधिका तामाङसहित तामाङ अगुवाको टोलीले गाईको मासु काटेर खान पाउने कानून बनाउन ध्यानाकर्षण गराएपछि माओवादी केन्द्रबाट गृहमन्त्री बनेका रामबहादुर थापा बादलले कानून बनाउने प्रतिबद्धता जनाएका हुन् । रोचक त के छ भने भने गाई काटेर खान पाउनुपर्छ भन्ने राधिका तामाङ पनि माओवादीकै नेतृ हुन् । 

जंगलमा गाई काटेर मासु भाग लगाइरहेको अवस्थामा गस्तीमा खटिएको सेनाले केही व्यक्तिलाई मकवानपुरबाट नियन्त्रणमा लिएपछि उनीहरुलाई रिहा गर्नुको साथै मासु खान पाउनुपर्ने माग उठेको हो। तामांग समुदायले ऐतिहासिक कालदेखि गाई गोरुको मासु खाने प्रचलन भएकोले गाई गोरु काटेर खादा जेल हाल्ने जुन ब्याबस्था छ यसलाई परिमार्जन गरि विधिगत हिसाव बाट उनीहरु माथिको अन्याय हटाउनु पर्ने माग उपसभामुख तामाङले गृहमन्त्रीसमक्ष राखेको बताइएको छ। नेपाल तामाङ घेदुङले विहिबार गृहमन्त्री बादल समक्ष माग पत्र पेश गर्न पुगेका प्रतिनिधि मण्डलको नेतृत्व गर्दै उपसभामुख तामाङले उक्त माग गरेकी हुन् । मागपत्र पेश गर्न प्रदेश ३ का उपसभामुख तामाङ तामाङ सांसद तथा अगुवाहरु पुगेका थिए ।

धर्मरिनपेक्ष देशमा हरेक जातिलाई आ–आफ्नो सांस्कृतिक र धर्मिक परम्परा अनुसार कार्य गर्न पाउने संवैधानिक अधिकार भएकोले पक्राउ गर्ने कार्य बन्द गरिनुपर्ने भन्दै उनीहरुले मुल संविधानसँग बाझिने कानुनी ब्यवस्थाको खारेज गरी दिर्घकालिन समधान निकाल्न माग गरेका छन् । जवाफमा गृहमृन्त्री थापाले कानुन संशोधन नगरी समस्याको समाधान नहुने भन्दै त्यसको लागि आवश्यक पहल गर्ने आश्वासन दिएको घेदुङका उपाध्यक्ष कुमार घिसिङले जानकारी दिए । गाई काटेर खाएको अभियोगमा मकवानपुर पदमपोखरीका कान्छीमाया ब्लोन, मंगलबहादुर ब्लोन र रामबहादुर ब्लोनलाई प्रहरीले पक्राउ गरेर मुद्दा चलाएको छ । गृहमन्त्री थापाको निवास पुल्चोकमा तामाङ घेदुङका उपाध्यक्ष कुमार घिसिङ, महासचिव बाबु घिसिङ, घेदुङका प्रमुख सल्लाहकार कुमार योञ्जन, सांसद हितबहादुर तामाङ, ३ नम्बर प्रदेशका उपसभामुख राधिका तामाङ, पुर्व राज्यमन्त्री सुर्यमान दोङ र प्रदेश ३ का सांसद ओम ग्लान लगायत ध्यानकर्षण गराउन पुगेका थिए ।

चैत्र ९  । प्रधानमन्त्री केपी शर्मा ओलीको राजकीय भारत भ्रमण तय भएको छ । उनी चैत २३ देखि २५ सम्म भारत आउने घोषणा केहि दिनमा हुने छ । ओलीले पहिलो भ्रमण भारतलाई रोजेका छन् । नेपाली अधिकारीका अनुसार नेपाल र भारतका परराष्ट्रमन्त्रालयले केहि दिनमै एकैपटक भ्रमणको मिति घोषणा गर्ने छन् । दोस्रोपटक प्रधानमन्त्री भएका ओलीलाइ भारतका प्रधानमन्त्री नरेन्द्र मोदीले तीनपटक फोनबाट र औपचारिक पत्र पठाइसकेका छन् । नेपाली दूतावासका प्रबक्ता हरि ओडारीले प्रधानमन्त्रीको भारत भ्रमणको तयारी भइरहेको तर मिति घोषणा भै नसकेको बताए । कुटनीतिक श्रोतका अनुसार ओलीको भ्रमण चैत २४ देखि २६ सम्मका लागि भारतले प्रस्ताव गरेको थियोे । तर नेपालले एक दिन पहिला हुने जवाफ पठायो । भारतले ओलीको अनुकुल हुने गरि चैत २३-२५ मा सहमति जनाएको छ । पहिलो प्रधानमन्त्रीका रूपमा ओलीले २०७२ फागुन ७ देखि ११ सम्म भारत भ्रमण गरेका थिए ।

चैत्र ९ | सौन्दर्यको प्रतीक फूल मन नपराउने को होला ? त्यसमा पनि वर्षको एक दिन मात्र फुल्ने त्यो फूल जसलाई श्रद्धा र भक्तिले हेर्ने गरिन्छ । त्यो फूल हेर्न कौतुहलताका साथ आउने आगन्तुकमा नेपालको मात्र नभई छिमेकी मूलुक भारतबाट आउनेको सङ्ख्या लाखौँमा रहेको छ । इसाको छैटाँै सातौँ शताब्दीदेखि फुल्दै आएको त्यो चमत्कारी फूल वैशाख १ गतेका दिन बिहानीपख फुल्नु र साँझपख मौलाएर जानु आफैँमा एउटा आश्चर्य र कौतुहलको विषय बनेको छ । दलितमध्ये अति पिछडिएको दुसाद जातिको कुलदेवता तथा अन्तर्राष्ट्रियस्तरमा पूजनसय रहेको वीरगाथाका वीर पुरुष सलहेशको जीवन गाथासँग जोडिएको त्यो फूल फुल्ने रूख केको हो । कसरी यतिका दिनसम्म बाँचिरहेका छन् । यस्ता प्रश्न वनस्पतिविद्का लागि अध्ययन र अनुसन्धानको विषय बनेको छ ।

प्रदेश नं २ अन्तर्गत पूर्वपश्चिम राजमार्गको लहानबजारदेखि पश्चिम र मत्स्यपालन केन्द्रदेखि दक्षिणमा रहेको प्रसिद्ध धार्मिक एवम् ऐतिहासिक सलहेश फूलबारीमा प्रत्येक वर्षको पहिलो दिन त्यो दुर्लभ फूल फुल्ने गर्दछन् । हारम जातका विशाल रूखमा एक्कासि फूल फुल्नु र वैशाख १ गते साँझपख स्वतः मौलाएर जाने घटना सबैका लागि अविश्वसनीय र कौतुहलको विषय बनेको छ । सलहेश को थिए ? सलहेशको जीवन गाथासँग फूलको के सम्बन्ध रहेको छ । यो जान्नलाई पौराणिककालमा फर्किनुपर्ने आवश्यकता रहेको छ ।

लोकगाथाका नायक वीर सलहेशको विवाह सीमावर्ती भारतको मधुवनी जिल्लाअन्तर्गत बरुवार भन्ने बलाठपुर निवासी बलाठकी छोरी सामैरसँग भएको थियो । आफ््ना पति सलहेशलाई पकडियागढका तत्कालीन राजा कुलेश्वरकी छोरी चन्द्रवतीले आफनो प्रेम प्रस्ताव अस्वीकार गरेपछि सलहेशलाई थुनामा राखेको खबर प्राप्त भएपछि सामैर पकडियागढ गई त्यहाँ आफ्ना सहपाठी दीना मालिनीको सहयोगमा सलहेशलाई थुनामुक्त गराएकी थिइन् ।

सलहेशलाई मनमनै हृदयदेखि मन पराएकी दीना मालिनी सलहेशसँग विवाह गर्न नपाउँदा उनले प्रण गर्दै प्रत्येक वर्ष तिम्रो प्रतीक्षामा वैशाखको पहिलो दिन हारमको त्यही रूखमा देखापर्ने भनेपछि सोहि दिनदेखि सलहेशको प्रतीक्षामा प्रत्येक वर्षको बैशाखको पहिलो दिन माला आकारमा मालिनी देखापर्ने गरेको किंवदन्ती रहिआएको छ । राजा सलहेशको गाथासँग जोडिएको महिसोथा, नन महरी पर्वत, छोपरा चौरी, विराटपुर, त्रिवेणीधाम, पकडियागढ, मानिक दहमा प्रत्येक वर्ष परम्परागत रुपमा मेला लाग्ने गर्दछन् । वैशाखको पहिलो दिन फूलबारीमा रहेको हारमको रूखमा सुनाखरी आकारको फूल फुल्ने गर्दछन् । जुन फूल हेर्न देश–विदेशबाट लाखौँको सङ्ख्यामा दर्शनार्थी आउने गर्दछन् । यही फूल र सलहेश फूलबारीले हालसम्म राजा सलहेशको गाथालाई जीवन्तता दिँदै आएको छ । भनिन्छ सलहेश एकै दिनमा मानिक दहमा नुहाउने, फूलबारीमा फूल टिप्ने, सिलहट अखाडामा कुस्ती खेल्ने, कुलदेवीको पूजा गर्ने तथा जनताको पीरमार्का सुन्ने गर्दथे ।

मैसोथा राज्यको राजा सलहेश र उनकी प्रेयसी मालिनी बीचको प्रेमविछोडका लागि प्रसिद्ध रहेको सलहेश फूलबारीमा प्रेमविवाह गर्दा दाम्पत्य जीवन सफल हुने र सन्तान प्राप्ति हुने किंवदन्ती रहिआएकाले यस फूलबारीभित्र रहेको हारमको रूखलाई युवायुवतीले 'लभ प्वाइन्ट'का रुपमा लिएको छ । भनिन्छ, युवायुवती बीचको प्रेमकथालाई जीवन्तता प्रदान गर्न फूलबारीमा रहेको सो रूखलाई साक्षी मानी विवाह गर्दा दाम्पत्य जीवन सफल हुने जनविश्वासअनुरुप प्रत्येक वर्ष सो फूलबारीमा विवाह गर्नेको सङ्ख्या बढदै गएको छ ।

फिरोज शेख लहान २०७४ चैत्र ९ | सिराहाकाे लहान बजारस्थित विकास ट्रेडर्स, सुनचाँदी पसलमा शक्तिशाली बम विष्फोट भएकाे छ । विष्फोटमा परि ८  जना घाइते भएका छन्।घाइते हुने हरुमा लहान ७ निवासी विकाश ट्रेडर्सका संचालक विकाश सारडा , उनका भाई राहुल सारडा , पसल मै काम गर्ने लहान ९ बस्ने अनुशिता कुमारी चौधरी , लहान ११ बस्ने विनिता कुमारी चौधरी रहेकी छिन भने सुनचांदी खरिद बिक्रि गर्न आएका ग्राहकहरु मध्ये सिरहा मझौरा बस्ने सिकिन्दर यादवको पत्नी देव कुमारी यादव र ७ वर्षीय छोरा  सतिश यादव रहेका छन् भने मधोपुर कालाबंजर बस्ने बबिता यादव र सप्तरी सुरुङ्गा नगरपालिका ६ बस्ने मोनिका देवी राम रहेकी छिन।

घाइतेहरु मध्ये ७ वर्षीय बालकको अवस्था गम्भीर रहेको छ। ४ जनाले कान सुन्न छोरेका छन् भने शरीरको विभिन्न ठाउमा बमको छररा लागेको छ। त्यसै बाकी ३ जना लाई बमको छरराले लाग्दा टाउको , खुट्टामा चोट लागि घाइते भएका छन्। पसलमा अपरिचित व्यक्ति एउटा भरिएको झोला सहित सुन किन्ने भनि आएको र एक छिनमा आउदै छु भनि झोला छोरी गएको केहि बेरमै उक्त झोलामा रहेकाे सामान विष्फोट भएकाे पसलका सञ्चालक  विकास सारडाले बताए। विष्फोट बाट पसल भित्र धेरै क्षति भएकाे छ । घाइतेहरु मध्ये ६ जनाको सप्तऋषि अस्पतालमा उपचार भइरहेको छ भने २ जनाको राम कुमार स्मारक अस्पतालमा उपचार भइरहेकाे छ । हाल सम्म बम किन र कसले राखेको भनि कसैले जिम्मा लिएको छैन।

'

जनकपुरधाम, चैत ९ । मुख्यमन्त्री लालबाबु राउतले प्रदेशमा स्वच्छताको स्तरलाई उच्च बनाउन प्रदेश सरकारले 'मुख्यमन्त्री स्वच्छता अभियान' संचालन गर्ने घोषणा गर्नु भएको छ । 

सिरहा जिल्लालाई प्रदेश नं. २को पहिलो खुल्ला दिशामुक्त जिल्ला घोषणा समारोहमा मुख्यमन्त्री राउतले स्वच्छता मानव विकासको पहिलो खुटकिलो रहेको उल्लेख गर्दै त्यसका लागी सरकारले स्वच्छता अभियानलाई नीति तथा कार्यक्रममा समेटदै अगामी बजेटमा विशेष व्यवस्था गर्न लागेको बताउनु भएको छ। 

उहाँले प्रदेशलाई सफा बनाउन आफै आठै जिल्लाको सडकमा झाडू लिएर उत्रिने उद्घोष समेत गर्नु भएको छ । 

मुख्यमन्त्री राउतले मानव सुचांकमा धेरै पछाडी रहेको प्रदेश नम्बर दुईलाई स्वास्थ्य, शिक्षा, र रोजगारमा ठुलै फडको मार्नु पर्ने आवश्यकता रहेको औल्याउदै त्यसकालागी सबैको सहयोग आवश्यक रहेको बताउनु  भयो । 

'अहिले सम्म हाम्रो विकास भएन भन्ने हामी भन्दै थियौ तर अब जिम्मेवारी हाम्रै काँधमा आएको छ । सबैलाई मिलेर यो जिम्मेवारीलाई पुरा गर्नु पर्दछ । ' उहाँको भन्नु भयो ' जनप्रतिनिधिहरुलाई सबै भन्दा बढी इमान्दार भएर अगाडी बढनु पर्दछ । अनि मात्र हामी देशकै नमूना प्रदेश बनाउन सक्छौ । 

भ्रष्टाचार यस प्रदेशको सबै भन्दा ठूलो समस्या रहेको उल्लेख गर्नुहुँदै मुख्यमन्त्री राउतले सरकार शुन्यसहनशिलताको नीति अवलम्बन गरेकाले भ्रष्टाचार गर्ने जो कोहीलाई पनि छुट निदिइने चेतावनी समेत दिनु भयो । 

उहाँले सर्वसाधारणलाई आग्रह गर्दै भन्नु भयो ,' कर्मचारी वा जनप्रतिनिधीले कुनै पनि काममा अनियमितता वा ढिलासुस्ती गर्छन भन्ने हामी कहाँ उजुरी गर्नुस, हामीले पनि अटेरी गरे सडकमा आउने छुट तपाईलाई छदैछ । '

मुलुकको ४८ औ खुल्ला दिशामुक्त जिल्ला बनेको सिरहाका स्थानीय तथा अभियानीहरुलाई  बधाई दिदै मुख्यमन्त्री राउतले प्रदेशको बाँकी जिल्लाको लागि सिरहा मार्ग दर्शक बन्ने विश्वास व्यक्त गर्नु भयो । 

जिल्ला समन्वय समिति सिरहाका सभापति रामचन्द्र ठाकुरको अध्यक्षतामा भएको खुल्ला दिशामुक्त जिल्ला घोषणा सभामा आर्थिक मामिला तथा योजना मन्त्री विजय यादव, प्रतिनिधी सभा सदस्य बोधमाया यादव,  लिलानाथ श्रेष्ठ, प्रदेश सभा सदस्य सुनिता राम, राम नरेश यादव लगायत जिल्ला स्थित विभिन्न कार्यालयका प्रतिनिधि, गैर सरकारी संस्थाका प्रतिनिधिहरु, स्थानीय तहका प्रतिनिधिहरुको व्यापक उपस्थिति रहेको थियो ।