सुनिल यादव चैत , १५ धनुषाको धनौजी गाउँपालिका वडा नं. ५ बहुअर्वा स्थित बासुदेव मा.वि.का प्राधानाध्यापक तपेश्वर मल्लिकले विद्यालयमा करोडौंको अनियमितता गरेको स्थानीयहरुले आरोप लगाएका छन । प्राधानाध्यापक मल्लिक र लेखापाल शिवेन्द्र यादवको मिलिभगतमा विद्यालयमा आर्थिक अनियमिता भएको उनीहरुले आरोप लगाएका हुन । स्थानीयहरुले शुक्रवार एक पत्रकार सम्मेलनको आयोजना गरि अवकाश पाईसकेका शिक्षक , कर्मचारीहरुको तलब र संचयकोष समेत हिनामिना गरेको बताएका छन । उनले विद्यालयबाट अवकाश पाईसकेका शिक्षक लखनदेव मंडलको २ वर्षको तलब र १ वर्षको संचयकोष समेत उलब्ध नगराएको पिडितले पत्रकार सम्मेलनमा गुनासो पोखेका छन । उनले विद्यालयबाट अवकाश प्राप्त कार्यालय सहयोगी गंगा पण्डित र रामेश्वर मंडल समेत अवकाशपछिको सुविधा उपलब्ध नगराएको आरोप छ । प्राधानाध्यापक मल्लिकले विद्यालयमा प्रत्येक वर्ष वितरण हुने छात्रवृति ९ वर्षसम्म वितरण नगरेको , विद्यालयको नाममा रहेको ३६ विघा जमिनबाट हुने आम्दानीको समेत हरहिसाब नदेखाएको , विद्यालयमा समयमा नियमित उपस्थित नहुने गरेको स्थानीय राजकुमार मंडलले गुनासो पोखेका छन । स्थानीयहरुले विद्यालयको सामाजिक लेखापरिक्षणको मांग गर्दै प्राधानाध्यापक मल्लिकलाई कारवाहीको मांग समेत गरेको छ । यता धनौजी गाउँपालिकाले समेत प्राधानाध्यापक मल्लिकलाई विद्यालयको शैक्षिक वातावरण खलबलिनुका साथै आर्थिक कारोवार दुरस्त नराखेको भन्दै निलम्बन गरेको छ । गाउँपालिकाको निर्णयलाई अटेर गर्दै उनले विद्यालयमा उपस्थित हुने गरेको धनौजी गाउँपालिका वडा नं. ५ का वडाध्यक्ष कमल नारायण पंकजले बताएका छन । उनले भने प्राधानाध्यापक मल्लिकको क्रियाक्लापले असन्तुष्ट विद्यार्थीहरु आफु कहां गुनासो लिएर आउने गरेको र विद्यालयको शैक्षिक अवस्था सुधार गर्न पटक पटक आग्रह गर्दा समेत कुनै सुनवाई नगरेको बताए ।

किशोर कुमार मंडल चैत १५ धनुषाको मिथिला बिहारी नगरपालिका वडा नं. ६ सिर्सियामा एक दिने आँखा शिविर सम्पन्न भएको छ । माँ लक्ष्मी युवा कमिटिको आयोजनामा भएको सो शिविरमा २ सय २५ जनाको आँखा परिक्षण गरिएको छ । आँखा परिक्षण गरिएकाहरु मध्ये ६५ जनामा मोतिया बिन्दु रहेको भेटिएको छ । मोतियाबिन्दु भएकाहरुको जनकपुर स्थित जानकी आँखा अस्पतलापमा शल्यक्रिया गरिने आयोजकले जनाएको छ । माँ लक्ष्मी युवा कमिटिका अध्यक्ष रामभरोस यादवको अध्यक्षतामा भएको सो कार्यक्रममा मिथिला बिहारी नगरपालिका नगर प्रमुख अनिल कुमार यादव प्रमुख अतिथि रहेको थियो । कार्यक्रममा क्लबका उपाध्यक्ष प्रदिप यादव , सचिव सुर्यदेव यादव , सह सचिव रामकुमार यादव , कोषाध्यक्ष अन्जु यादव , अनिता देवी साह , रामप्रकाश यादव , प्रमोद मंडल , सुरेश मंडल , श्याम मंडल , महादेव यादव , बिनोद मंडल , प्रदिप साह , जिवछ यादव , ललित झा , उमेश साह सहितका व्यतिmहरुको उपस्थिति रहेको थियो ।

काठमाडौं, चैत्र १५ गते । लगातार प्रश्नपत्र बाहिरिएपछि शिक्षामन्त्रालयले प्रदेश २ को माध्यमिक शिक्षा परीक्षा (एसईई)का बाँकी परीक्षा स्थगित गरेको छ । बिहीबार विज्ञान र शुक्रबार सामाजिक विषयको प्रश्नपत्र बाहिरिएपछि शिक्षा, विज्ञान तथा प्रविधि मन्त्रालयले प्रदेश २ मा २१ गतेसम्मका सबै परीक्षा स्थगित गर्न राष्ट्रिय परीक्षा बोर्डलाई निर्देशन दिएको छ ।

बिहीबार रद्द भएर २२ गतेका लागि तय भएको विज्ञान विषयको परीक्षा भने हुनेछ । मन्त्री गिरिराजमणि पोखरेलले भने, '२२ गतेदेखि जोडेर बाँकी परीक्षा गर्ने प्रयासमा छौं । व्यवस्थापकीय पक्षमा छलफल गरेर परीक्षा तालिका प्रकाशित गर्छौं ।'

मन्त्री पोखरेलका अनुसार यसअघि सञ्चालन भइसकेको परीक्षा भने रद्द हुने छैन । मन्त्री पोखरेलले प्रश्नपत्र आउट गर्नुलाई आपराधिक घटना भएको र संलग्नलाई कारबाही गरिछाड्ने बताए ।

प्रश्नपत्र बाहिरिएको सम्बन्धमा राष्ट्रिय परिक्षा बोर्डले छानबिन समिति गठन गरेर छानबिन थालेको छ भने केन्द्रीय अनुसन्धान ब्यूरोले पनि छानबिन थालेको छ । प्रदेश दुईमा २६२ परीक्षा केन्द्र मा ७० हजार ५ सय ६२ परीक्षार्थी सहभागी छन् ।