Onlinesiraha-Nepali

रौतहटमा प्रहरी र राजपाबीच भिडन्त, ५० राउन्ड चल्यो गोली, ५ घाइते
जनकपुरमा गुण्डाराजको अन्त्य गर्छु, मधेसविरोधीलाई भगाउँछुः राजेन्द्र महतो
राजपाले राजेन्द्र महतोलाई जिताउन जनकपुरमा शनिबार चुनावी सभा गर्ने
चुनाव नजिकिँदै गर्दा सिरहामा विष्फोटका घटनामा बृद्धि
सहिद नगरपालिकाको कोरारी पोखरी सौन्दर्यकरण गरिने
सिराहामा उम्मेदवार एबम पूर्वमन्त्रीमाथि गोली प्रहार

रौतहटमा प्रहरी र राजपाबीच भिडन्त, ५० राउन्ड चल्यो गोली, ५ घाइते

Posted: 01 Dec 2017 08:02 AM PST

रौतहट । बुधबार मध्यराति रौतहटमा राजपा कार्यकर्ता र प्रहरीबीच भिडन्त भएको छ । ५ जना घाइते भएका छन् । प्रहरी र राजपाका कार्यकर्ताहरुबीच झडप भएपछि बुधबार मध्यरातिसम्म रौतहटको गरुडा नगरपालिका ५ महमदपुर तनावग्रस्त बनेको हो ।
मधेस आन्दोलनका दृष्यहरु प्रोजेक्टरको माध्यमबाट देखाउँदै राजपाले चुनाव प्रचार गरिरहेको बेला प्रहरीले हस्तक्षेप गरेपछि झडप सुरु भएको बताईएको छ । झडपमा बालकसहित पाँचजना घाइते भएका छन् । उनीहरुको रौतहटका चपुर, गरुडा र गौरका अस्पतालहरुमा उपचार भइरहेको छ । प्रहरीतर्फ पनि घाइते भएको भनिए पनि संख्या खुलाइएको छैन ।महमदपुरमा प्रोजेक्टर नियन्त्रणमा लिन खोजेपछि मधेसवादी दलका कार्यकर्ताले प्रहरीलाई घेरा हालेका थिए । त्यसपछि प्रहरीले हवाई फायर र टियर ग्यास प्रहार गरेको थियो । गाउँका चोक-चोकमा पुगेर पनि प्रहरीले टियर ग्यास प्रहार गरेको स्थानीयबासीको दावी छ ।स्थानीयले ५० राउन्ड हवाइ फायर भएको दावी गरे पनि करिब २० राउण्ड हवाइ फायर भएको प्रहरी स्रोत बताउँछ । त्यहाँ प्रहरि पनि घाइते भएकाे स्थानीयले बताए पनि जिल्लाका प्रहरी कार्यालयले भने यस विषयमा केहि जानकारी दिन चाहेन । स्थिति तनावग्रस्त भएपछि राति नै महमदपुरमा सशस्त्र प्रहरीको थप फोर्स झिकाइएको बताइएकाे छ ।यसअघि पिपरा रजवारा भन्ने ठाउँमा पनि प्रहरीले हस्तक्षेप राजपाकाे कार्यक्रममा हस्तक्षेप गरेकाे थियाे । त्यहाँकाे अवस्था अझैसम्म पनि तनाग्रस्त रेहकाे हाम्रा सम्बाददाता जयनारायण यादवले बताएका छन् । घटनाबारे थप बिबरण अाउन बाँकी नै छ ।

जनकपुरमा गुण्डाराजको अन्त्य गर्छु, मधेसविरोधीलाई भगाउँछुः राजेन्द्र महतो

Posted: 01 Dec 2017 06:00 AM PST

१५ मंसिर, धनौजी (धनुषा) । काठमाडौंका केही मिडियामा कांग्रेस र मधेसवादी गठबन्धनबीच राजेन्द्र महतोलाई ब्याक गराएर बिमलेन्द्र निधिलाई जिताउन अन्तिम कसरत भइरहेको समाचार आउँदा राजपा अध्यक्ष मण्डलका सदस्य महतो भने गाउँमा भोट माग्दै थिए ।

धनुषा क्षेत्र नम्बर ३ का मुखियापट्टी मुसरनिया, धनौजी र नगराइनका टोलटोलमा निधिविरुद्ध घृणायुक्त भाषण गर्दै मत मागिरहेका महतोलाई कटरियामा भेटिएपछि हामीले सोध्यौं– भारतीय दूतावासले पनि निधिलाई छाड्न तपाईमाथि दबाव दिएको हो ?

आक्रोशित मुद्दामा महतोले भने– 'मधेसी जनताको हत्या गर्ने, टाउकोमा गोली बर्साउने, मधेसविरोधी संविधानमा सबैभन्दा पहिले ठप्पा लगाउने अत्याचारीलाई मैले किन छाड्ने ?'

महतो यतिमा मात्रै रोकिएनन्, निधिले सबैतिरबाट हार्ने देखेर बिरामीको नाटक गर्दै काठमाडौंमा शक्तिकेन्द्रहरु गुहारेको आरोपसमेत लगाए ।

चुनाव हार्ने भएपछि राष्ट्रियसभामा जाने गरी निधि आफैं ब्याक हुन लागेको हल्ला आफूले सुनेको महतोले बताए ।

निधिको २ पुस्ताले २५ वर्षदेखि जनकपुरबाट चुनाव जित्दा पवित्र जनकभूमि नरक बनेको र अपराधी तथा गुण्डागर्दीको अखडा बनाएको आरोपसमेत लगाए महतोले ।

राजपा नेता महतोले मधेस आन्दोलनको राप र ताप नै आफ्नो जितको आधार रहेको भन्दै निधिप्रति आक्रोश पोखे । चुनावी सभा र घरदैलोमा समेत निधिलाई मधेसबिरोधी र मधेसीको हत्यारा करार गर्दै हिँडेका महतोले झण्डै कांग्रेसको हाराहारीमा मत रहेको एमालेका बारेमा भने बोल्ने गरेका छैनन् ।

कतिपयले जेलभित्रैबाट सञ्जय साहले विमलेन्द्र निधिलाई समर्थन गरेपछि एमालेको मत आफूतिर तान्न महतोले एमालेविरुद्ध नबोलेको आशंका पनि गरेका छन् । हामीले उनीसँगको कुराकानी यहीँबाट शुरु गर्‍यौंः

एमालेको मत पनि यो क्षेत्रमा उल्लेख्य रहेछ, निधिले 'सञ्जय कार्ड' खेलेपछि तपाईंले 'एमाले कार्ड' खेल्न खोजेको हो ?

हेर्नुस, मतदाता कसैको गुलाम हुँदैन । मतदाताले आफ्नो विचार समयको मागअनुसार परिर्वतन गर्छ । अहिले यहाँ मधेसवाद उत्कर्षमा छ । मधेस आन्दोलनको केन्द्रविन्दू जनकपुर हो । मधेस आन्दोलनमा के कांग्रेस, के एमाले, के माओवादी सबै पार्टीका मान्छेहरु सहभागी भएका हुन् ।

यो निर्वाचनरुपी मधेस आन्दोलनमा पनि एमाले समर्थक मतदाताहरु सहभागी हुनेछन् र मलाई मतदान गर्नेछन् । एमालेको मात्र होइन, मलाई कांग्रेसको पनि मत आउछ ।

तैपनि तपाईले ती मतदातबाट कस्तो प्रतिक्रिया पाउनुभएको छ त ?

तपाई हेरिरहनुभएको छ, जनताको प्रतिक्रिया धेरै राम्रो छ । उत्साहका साथ चुनावी प्रचार अभियान चलेको छ । गाउँगाउँबाट मधेसी जनता आन्दोलनकै रुपमा सहभागी भएका छन् । यो त चुनाव प्रचारभन्दा पनि मधेस आन्दोलन हो भनेर यहाँका जनताले बुझेका छन् । मधेस आन्दोलनलाई अघि बढाउन जनता उत्साहका साथ लागेका छन् । यो राजेन्द्र महतो जित्ने कि नजित्ने भन्दा पनि मधेस आन्दोलनले जित्ने कि नजित्ने भन्ने लडाइ भएको छ ।

भनेपछि, तपाई यहाँ मधेस आन्दोलनको सेन्टिमेन्ट क्यास गरेर चुनाव जित्न सकिन्छ भन्ने दाउमा हुनुहुन्छ होइन त ?

यो निर्वाचन पनि एउटा आन्दोलन हो । हामीले आन्दोलनकै रुपमा स्वीकार गरेको हो । सडक आन्दोलन हामीले गरेका हौं, यो अब संसदीय आन्दोलनको तयारी हो । निर्वाचनलाई कडीका रुपमा प्रयोग गरेको हो । त्यसैले मधेस आन्दोलनको भावनात्मक मत त मलाई आउछ नै ।

तर, तपाईलाई ब्याक गरेर विमलेन्द्र निधिलाई समर्थन गराउने हल्ला एकाएक चल्यो नि ? माथि केही न केही त हुँदैछ कि ?

यो मधेस बिरोधी संविधान बनाउनेमा अहम् भमिका निधिजीको छ । मधेस आन्दोलनमाथि गोली चलाउने आदेश उहाँले दिनुभएको हो । मधेसीलाई गोली चलाउने र जनताको अधिकार खोस्ने उहाँ नै हो । वास्तवमा भन्नुहुन्छ भने सबैभन्दा ठूलो मधेस बिरोधी र मधेसीको हत्यारा त बिमलेन्द्र निधि हो भनेर यहाँका जनताले भनिरहेका छन् ।

यस्तो व्यक्तिलाई मधेस आन्दोलनको केन्द्रविन्दू, मधेसको राधजानी जनकपुरबाट अब चुनाव जिताउन मैले 'ब्याक' हुने भन्ने त सोच्नै सकिन्न ।

२५ वर्षदेखि यो क्षेत्रका जनताको मत लिएर न जनताले विकास पाए, न अधिकार पाए । जनता मधेस आन्दोलनको पक्षमा छन् । परिवर्तनको पक्षमा मधेसी जनता छन् । कसले के दुस्प्रचार गर्छ, त्यो उनीहरुलाई थाहा होला । हामी जनताका बीचमा छौं । सायद निधिजी आफैं हार्ने भएर 'ब्याक' हुने कुरा सुनेको छु ।

तर, उहाँ यसबीचमा काठमाडौंमा हुँदा शक्तिकेन्द्रका मान्छेहरुले पनि भेट गरे, यसबीचमा सञ्जय कुमार साहले जेलबाटै समर्थन पनि गरे, यसले तपाईलाई दबाव त बढ्यो नि ?

हा हा हा । यो सबै पराजित मानसिकताको द्योतक हो । जुन व्यक्तिलाई बिमलेन्द्र निधिले आफैंले अपराधी घोषित गरेको हो, जसलाई निधि आफैैंले जेल पठाएको हो, त्यही व्यक्तिको सहाजार लिइरहेको छ अहिले । यसबाट के प्रमाणित हुन्छ भने जनकपुरमा अपराधीकरणलाई बढावा दिने व्यक्ति निधि नै हुन् । अपराधीकरण र गुण्डागर्दी कसले चलाएको रहेछ भन्ने पुष्टि भयो ।

होइन, मैले सोध्न खोजेको के हो भने तपाईलाई 'ब्याक' गराएर लोकतान्त्रिक गठबन्धन अझै पनि बनाउन सकिन्छ भन्ने कुरा आएको हो कि हैन ?

लोकतान्त्रिक गठबन्धन त अब नारामा मात्रै सीमित भयो । यो निधिजीकै कारण भएको हो । कांग्रेसबाट लोकतान्त्रिक गठबन्धन बनाउने प्रयास नै भएन ।

गठबन्धन बनाउँदा लोकल इलेक्सनको परिणामलाई आधारका रुपमा लिन सकिन्छ भनिएको पनि हो । त्यसो गर्दा मधेसी गठबन्धनले यो मधेसमा सम्मानजनक स्थान पाउनुपर्ने हो । तर, त्यसका लागि कांग्रेस तयार भएन ।

खासगरी धनुषा–३ नम्बर क्षेत्रको कुरा गर्दा राजपा कांग्रेसभन्दा अगाडि छ । जो अगाडि छ, उसले नै गठबन्धनमा सिट पाउने हो । यो धनुषा ३ नम्बर क्षेत्र राजपा र मधेसी गठबन्धनले पाउने हो । तर, उहाँ (निधि) को व्यक्तिगत आकांक्षाका कारण लोकतान्त्रिक गठबन्धन बन्न दिनुभएन । नदिएको पनि ठिकै भयो । त्यस्तो अत्याचारी, मधेस बिरोधी व्यक्ति, जसले हामीलाई धोका दियो भनेर निधिको बारेमा यहाँका जनताले भनिरहेका छन अहिले ।

मधेसी जनतालाई ठग्ने, मधेसीको टाउकोमा गोली ठोक्न आदेश दिने, मधेसबिरोधी संविधान बनाउने व्यक्तिलाई हराउने उपयुक्त मौका यहाँका जनताले पाएका छन् । यो मौका जनता गुमाउन चाहँदैनन् ।

तपाईको सम्पूर्ण आरोप निधि मधेस बिरोधी हुन् भन्नेमै केन्द्रित देखिन्छ । तर, उहाँले त म मधेस र पहाडको मध्यस्थकर्ता हुँ, मेरो भूमिकालाई न्याय हुनुपर्‍याे भनिरहनुभएको छ नि ?

हो, उहाँको भूमिका त प्रष्टै देखिएको छ । संविधान बनाउनेमा अग्रणी भूमिका निर्वाह गर्नुभयो । मधेसीको अधिकार कुण्ठित गराउन उहाँको भूमिका देखियो । मधेसी जनताको हत्या गराउन त उहाँले आफैं गृहमन्त्री भएकाले बेला आदेश नै दिनुभयो । मलेठमा बिनाकारण गोली हान्न आदेश दिएर ६ जना मधेसी जनताको हत्या गरेको त उहाँले नै हो नि । मधेसी जनताको अधिकार खोस्ने मामिलामा उहाँ मध्यस्थकर्ता बन्नुभएकै हो ।

र, त्यही उहाँको भूमिकाप्रति यसपटक यहाँका जनताले न्याय गर्नेछन् । जस्तो करनी, उस्तै भरनी भन्छन् नि ।

तपाईकै पार्टीबाट निर्वाचित सांसद सञ्जयकुमार साह, जो जेलमा छन् उनी नै यो क्षेत्रका चुनावमा निर्णायक हुने हल्ला चलिरहेको छ, अर्कोतिर जीवनाथ चौधरी जो सञ्जय साहका विपरीत ग्याङ चलाउँछन् उनी त निधिकै दाहिने हात भइहाले, यसबाट तपाई डराउनुभएको छैन ?

योचाहिँ चिन्ताको विषय हो । मलाई अरु डर त होइन, जनकपुरमा फेरि दुईटा ठूला अपराधिक गिरोह एक ठाउँमा आउने हुन् कि भन्ने चिन्ता छ । यसले गर्दा जनकपुरका शान्ति खल्बलिन सक्छ । मधेसको राजधानीलाई अपराधीकरण गर्ने उद्देश्यबाट यस्तो भएको हुन सक्छ । निधिजी मधेसको राजधानी जनकपुरलाई अपराधीकरण गर्नतर्फ लाग्नुभएको छ । तर, जनताले कुनै हालतमा स्वीकार गर्दैनन् । अहिलेको हाम्रो लडाई अपराधिकरण विरुद्धको लडाइ पनि हो ।

मधेसको राजधानी जनकपुरलाई सांस्कृतिक, पवित्र भूमिको रुपमा जोगाइराख्न पनि यसपटक निधिलाई परास्त गर्नुपर्छ भन्ने जनताको आवाज छ । यहाँ निधिको होइन, विधीको शासन लागु हुनुपर्छ भन्ने जनताले मलाई जिताउने छन् ।

जनकपुर भनेको विद्धान ऋषिमुनिहरुको तपोभूमि हो, गुण्डा र अपराधीको राज्य स्थापित गर्न खोज्ने र दुईटा गुण्डा मिलाउने निधिजीको प्रयास बेकार हो ।

तर, उनीहरुले तपाईको चुनावी परिणामलाई त हेराफेरि गराउन सक्छन् नि होइन र ?

होइन । बिल्कुल होइन । यस्ता अपराधी र गुण्डाहरु एक ठाउँमा आएका हुन् भने त्यसबाट मलाई फाइदा छ । यसबाट उनीहरुको, विशेष गरी बिमलेन्द्र निधिको अनुहार उदांगो भएको छ । जनकपुरका अपराधीहरुको एकता देखिएको छ । चोर चोर मौसेरा भाइ भन्छन् नि, आखिर गुण्डा र अपराधीहरुको संरक्षक को हो, उनीहरुलाई कसले चलाइरहेको छ भन्ने जनताले छर्लङ्ग बुझ्न पाए । जनकपुर बमकाण्ड कसले गराएको रहेछ ? मिथिला राज्य बन्न नदिने को रहेछ ? यहाँ हत्या आतंका मच्चाउने को रहेछ ? सार्वजनिक र मठ मन्दिरका सम्पत्ति हडप्ने को रहेछ ? सबै कुरा बुझियो नि ।

तर, जेलबाटै १० हजार भोट निधिलाई दिलाउने सञ्जय साहसँग हैसियत छ रे नि ?

१० हजार भोट हाल्छ कि घटाउछ हेर्दै जानुस् ।

हामीले यस क्षेत्रका गाउँतिर पनि भ्रमण गर्‍यौं, कतिपय मान्छेले तपाई अधिकारको मात्र कुरा गर्नुहुन्छ, तर निधिले विकासको कुरा गर्छन् भन्दा रहेछन् नि ? अधिकारको मात्रै कुरा गरेर जनकपुरको विकास हुन्छ ?

खै विकास गरेको त ? दुईपुस्तादेखि निधि परिवारले यहाँका जनताको मत लिएको छ । पटक–पटक जनताको मत लिएर सांसद भयो, मन्त्री भयो । तर, जनकपुरलाई नरक बनाएर राखेको छ । यही हो विकास ? रोडको अवस्था हेरिहाल्नुभयो, खानेपानीको अवस्था देखिहाल्नुभयो । यहाँ विकास होइन, अपराधीकरण बढाइएको छ ।

अधिकार प्राप्तिपछि विकास स्वतः हुन्छ । अधिकार प्राप्त भएन भने केही पनि विकास हुँदैन । २५ वर्षदेखि उहाँहरुले नै जितेको हो, विकास त केही भएको छैन । अहिले आएर विकासको कुरा गर्ने फटाहाले ? हामी विकास पनि दिन्छौं, अधिकार पनि दिलाउँछौं ।

विमलेन्द्र निधिले मधेसकै पक्षका बोल्दा पहाडेबाट गाली खाए, अहिले तपाईहरुको निशाना पनि उनीमाथि नै छ, यो त अन्याय भएन र ?

मधेसीको भोट लिएर मधेसीमाथि गोली हानेको छ । त्यो त कुनै पहाडेले होइन, म मधेसीको छोरो हुँ भनेर हिजो लिएको व्यक्ति बिमलेन्द्र निधिले नै हो । मधेसी जनताले एक–एक हिसाब पाई–पाई लिनेवाला छ ।

हिजो निधिले बुलेटले मधेसीलाई मारेको हो, अब मंसिर १ गते जनताले ब्यालेटले मार्नेवाला छ । मधेसीको टाउकोमा गोली हानेको त निधिले हो नि, त्यसको हिसाब जनताले स्वस्तिक छापबाट उनको टाउकोमै हानेर लिनेछ । अनि त राम नाम सत्य हो भन्ने अवस्थामा पुग्नेछन् । मधेस र मधेसीको सबैभन्दा ठूलो सत्रु र अत्याचारी नै बिमलेन्द्र निधि हुन् ।

तर, निधिजी पुस्तौंदेखि यही क्षेत्रबाट चुनाव लडेका छन्, तपाई चाहिँ सर्लाहीबाट भागेर यहाँ आएको आरोप रहेछ नि ?

म भाग्नेवाला होइन, भगाउन आएको हुँ । पुस्तौंदेखि जनकपुरको जनतामाथि शासन गर्ने, मधेसविरोधी संविधान बनाउने, मधेसीको टाउकोमा गोली ठोक्ने निधिलाई भगाउन आएको हुँ । जनकपुर मेरो घर हो, म किन भाग्ने ? मधेस आन्दोलन गर्दा कहिले जोगवनी नाकामा पुगेर ज्यानको बाजी थापेँ, कहिले वीरगञ्ज त कहिले सुनौली पुगेँ । म कहाँको हुँ ? म मधेसी धर्तीपुत्र हुँ । यो जनकपुर मधेस आन्दोलनको केन्द्र हो, मधेसको राजधानी हो, त्यसैले मधेस आन्दोलनको अनुमोदनका लागि म यहाँबाट उम्मेदवार बनेको हुँ । मेरो लडाई त निधिजीका मालिकसँग हो, जो काठमाडौंमा छन् ।

निधिको शासन अब सकियो । अब विधिको शासन लागु हुनेछ जनकपुरमा । यो उनको अन्तिम एपिसोड हो । साभार अनलाइनखबर डटकम

राजपाले राजेन्द्र महतोलाई जिताउन जनकपुरमा शनिबार चुनावी सभा गर्ने

Posted: 01 Dec 2017 05:42 AM PST

जनकपुर । राष्ट्रिय जनता पार्टी नेपाल र संघीय समाजवादी फोरम नेपाल मिलेर बनेको मधेशी गठबन्धले भोली जनकपुरमा बृहत चुनावी जनसभा आयोजना गर्ने भएको छ ।

जनकपुरको फुलगामामा हुने चुनावीसभालाई राजपा अध्यक्ष मण्डलका संयोजक महन्थ ठाकुर, फोरम नेपालका अध्यक्ष उपेन्द्र यादवसहित धनुषा—३ बाट प्रतिनिधिसभा सदस्यका उम्मेद्वार राजेन्द्र महतोले सम्बोधन गर्ने कार्यक्रम रहेको छ ।

मधेशी गठबन्धनले यसअघि गत शनिवार सप्तरीको राजविराजमा संयुक्त चुनावी सभा गरेको थियो । राजपा नेपालका धनुषा संयोजक संजय सिंहले जनकपुरमा संयुक्त सभाका लागि सबै आवश्यक तयारी पुरा भईसकेको जानकारी दिंदै विशाल सभाले स्थानीय जनता र मतदातामा मात्र नभएर सम्पूर्ण मधेशमा यसको असर पर्ने दाबी गरे ।

संयुक्त जनसभामा राजपा र फोरमका चार वटै क्षेत्रका प्रतिनिधिसभा र प्रदेश सभाका उम्मेदवारहरुको सहभागिता हुने जिल्ला संयोजक सिंहले बताए । फुलगामामा हुने सभामा १० हजार समर्थक ल्याउने दाबी आयोजकले गरेको छ ।

धनुषा—३ नम्बर क्षेत्रबाट उम्मेदवार रहेका राजपा अध्यक्ष मण्डलका नेता राजेन्द्र महतोको पक्षमा मधेशी गठबन्धनले चुनावी सभा गर्न लागेको हो । स्रोत:खरीबोट

चुनाव नजिकिँदै गर्दा सिरहामा विष्फोटका घटनामा बृद्धि

Posted: 01 Dec 2017 02:57 AM PST

सिरहा । आसन्न प्रतिनिधिसभा र प्रदेशसभा सदस्य निर्वाचनको मतदानको मिति नजिकिँदै गर्दा सिरहामा चुवनाव प्रसार कार्यालय र उम्मेदवार लक्षित विष्फोट र गोली प्रहारको घटना बढेका छन् ।

मंसिर ८ गते सिरहाको क्षेत्र नं. ४ मा पर्ने मिर्चैया नगरपालिका ५ स्थित वाम गठबन्धनको कार्यालय नजिकै भएको बम विष्फोटबाट शुरु भएको विष्फोट र गोली प्रहारको घटना बिहीबार उम्मेदवारको घर र चुनाव प्रचारको जीपसम्म आइपुगेको छ । पछिल्लो एक हप्ताको अवधिमा निर्वाचनलाई नै केन्द्रित गरेर हताहती नै हुनेगरी विष्फोटका घटना नभएपनि आधा दर्जनभन्दा बढी ठाउँमा भएका विष्फोटका घटनाले सर्वसाधारणमा भने त्रास बढेको छ ।

प्रधानमन्त्री शेरबहादुर देउवाले बिहिबार काङ्ग्रेसको चुनावी आमसभालाई सम्बोधन गरेको भगवानपुरमै संघीय समाजवादी फोरम नेपालबाट सिरहा क्षेत्र नं. १ का उम्मेदवार रहेका राजलाल यादव चढेको जीपमा नै बिहीबार राती गोली प्रहार भयो भने वाम गठबन्धनबाट सिरहा क्षेत्र नं. २ मा प्रतिनिधिसभा सदस्यका उम्मेदवार सुरेशचन्द्र दासको औरहीस्थित घर नजिकैको करेसा बारीमा शक्तिशाली विष्फोट भएको छ ।

त्यसअघि सिरहाको धनगढीमाई नगरपालिका ५ फुलकहाकट्टीमा फोरमबाट प्रतिनिधिसभा सदस्यका लागि २ नं. क्षेत्रका प्रत्याशी पूर्व राज्यमन्त्री शत्रुधन प्रसाद सिंह चढेको जीपमा कुकर बम भेटिएको थियो । निर्वाचन प्रसार प्रसारका लागि सिंह चढेको बा. ३ च ७६६१ नम्बरको जिपमा कुकर बम भेटिएको थियो ।

सुरक्षा व्यवस्था भरपर्दो : प्रहरी

दोस्रो चरण अन्तर्गत हुन गईरहेको प्रतिनिधिसभा र प्रदेशसभा सदस्य निर्वाचनको प्रचार प्रसारको क्रममा विष्फोटको घटना हुन थालेपछि सिरहा प्रहरीले सुरक्षा सतर्कता बढाएको जनाएको छ । जिल्ला प्रहरी कार्यालय सिरहाका प्रमुख प्रहरी उपरीक्षक शेखर कोइरालाका अनुसार निर्वाचनको तयारी र मतदानको समयसम्म सर्वसाधारणलाई भरपर्दो सुरक्षा दिन जिल्लाका अति संवेदनशील, संवेदनशील र सामान्य मतदानस्थलमा दुई हजार तीन सय ५० म्यादीसहित दुई हजार दुई सय ५० नेपाल प्रहरी परिचालन गरिएको छ । त्यससँगै प्रहरी निरीक्षकको कमाण्डमा जिल्लामा २० जना प्रहरी रहने गरी रिजर्भ फोर्ससँगै हरेक गाउँ र नगरपालिकामा दुई/दुई वटाको दरले ३४ वटा मोवाइल टोली परिचालन गरिंदैछ ।

मतदानको दिन मतदानस्थलको सुरक्षाको भित्री भागमा म्यादी र नेपाल प्रहरी, त्यसको बाहिर सशस्त्र र बाहिरी भागको सुरक्षा नेपाली सेनाले गर्ने गरी सुरक्षा योजना बनाइएको प्रहरी उपरीक्षक कोइरालाले बताए । प्रहरी उपरीक्षक कोइरालाका अनुसार त्यसका अतिरिक्त निर्वाचन नहुञ्जेल सुरक्षाको दृष्टिकोणले संवेदनशील मानिएका जिल्लाका ५० ठाउँमा म्यादी, नेपाल प्रहरी र सशस्त्र प्रहरीसहितको अस्थायी विकेट टोली २४ घण्टा परिचालन गरिएको छ ।

त्यसैगरी, सशस्त्र प्रहरी बल सीमा सुरक्षा कार्यालय सिरहाका प्रमुख सशस्त्र प्रहरी उपरिक्षक गोपाल गुरुङ्का अनुसार जिल्लाको १ र ३ नं. क्षेत्रलाई संवेदनशील क्षेत्रको रुपमा राखेर पाँच÷पाँच वटा स्ट्रयाकिङ् फोर्स, आठ÷आठ वटा मोवाइल टोली र क्षेत्रभरी हेर्नेगरी डिएसपीको कमाण्डमा २० जनाको रिजर्व टोली खटाइएको छ । क्षेत्र नं. २ र ४ लाई अति संवेदनशील क्षेत्रको रुपमा राख्दै १०÷१० वटा मोवाइल टोली र पाँच/पाँच वटा स्ट्राकिङ फोर्स परिचालन गरिएको छ । त्यस्तै, जिल्लाको समग्र निर्वाचन सुरक्षालाई कभर गर्नेगरी नेपाली सेनाले भने जिल्लाको १३ स्थानमा निर्वाचन सुरक्षा बेस क्याम्प स्थापना गरी सुरक्षाको प्रबन्ध मिलाएको नेपाली सेनाको चोहर्वा गणले जनाएको छ । -Ratopati

सहिद नगरपालिकाको कोरारी पोखरी सौन्दर्यकरण गरिने

Posted: 01 Dec 2017 01:49 AM PST

नरेश चन्द्र बरबरिया धनुषा, मंसिर १४ गते ।
धनुषाको हदिनगरपालिका ७ नेमुवा टोलमा रहेको कोरारी पोखरी सौन्दर्यकरण हुने भएको छ । कोरारी पोखरीलाई संरक्षण सम्बर्धन गरि पर्यटनको रुपमा विकास गर्न पोखरीको उत्तर छेउमा सहिद नगरपालिकाले घाट निर्माण गर्ने निर्णय गरेको हो ।
त्यसै गरि पोखरीको पूर्वी र पश्चिम डिलमा वृक्षारोपन गर्ने सहिद नगरपालिकाका मेयर उदयकुमार बरबरियाले जानकारी दिएका छन् ।

सिराहामा उम्मेदवार एबम पूर्वमन्त्रीमाथि गोली प्रहार

Posted: 01 Dec 2017 01:28 AM PST

सिरहा, १५ मंसिर । संघीय समाजवादी फोरम नेपालबाट सिरहा क्षेत्र नम्बर १ का प्रतिनिधि सभा सदस्य उम्मेदवार पूर्व मन्त्री राजलाल यादवलाई लक्षित गोली प्रहार भएको छ ।यादव चढेको गाडीमा अज्ञात समूहले बिहीबार राति गोली हानेको छ । लहानबाट घरदैलो सकी राति ७ बजे भगवतीपुर हुँदै आफ्नो गाउँ नहरा जाँदै गरेको अवस्थामा भगवतीपुर गाउँको सरेहमा अज्ञात समूहले दुई राउन्ड गोली हानेको हो ।

राजपाका केन्द्रीय सदस्य राकेश झाले गोली प्रहारबाट पूर्वमन्त्री यादव बालबाल बचेको बताए । गाडी तीब्र गतिमा रहेकोले बन्दुकको गोली गाडीको पछाडिको बायाँ साइडको शिशामा लागेर शिशा फुटेको छ । राजपा केन्द्रीय सदस्य झाका अनुसार एक साता यता आधा दर्जन भन्दा बम विष्फोटको घटना भएको छ ।

सिरहा क्षेत्र नं २ को जिरो माइल भन्ने ठाउँमा अज्ञात समूहले बुधवार बम विष्फोट गराएको थियो भने चार दिन पहिले क्षेत्र नं ४ का माओवादी प्रतिनिधि सभा सदस्य उम्मेदवार रामशंकर नायक 'अभिनाश'को मिर्चियाको प्रचार कार्यालयमा बम राखिएको थियो ।

Online siraha -Mobile Version

Search This Blog

Blog Archive

Report Abuse

About Me

Onlinesiraha-Nepali

Onlinesiraha-Nepali

about author

Related Articles

No comments:

Post a Comment