फागुन २७ । उपप्रधानमन्त्री एवम् गृहमन्त्री विमलेन्द्र निधिले कञ्चनपुरको सीमामा भारतीय सुरक्षाकर्मीको गोली प्रहारबाट निधन भएका नेपाली नागरिक गोविन्द गौतमलाई सहिद घोषणा गरेको जानकारी दिनुभएको छ । व्यवस्थापिका–संसद्को आजको बैठकमा कञ्चनपुर र सप्तरी घटनाका सम्बन्धमा सांसदहरुले उठाएका प्रश्नको जवाफ दिँदै गृहमन्त्री निधिले सहिद घोषणाका साथै रु दस लाख राहतस्वरुप उपलब्ध गराउने, गौतमको अन्त्येष्टि सम्मानपूर्वक गरिने र सन्ततिको निःशुल्क पठनपाठन गराइदिने निर्णय भएको पनि जानकारी दिनुभयो । संसदमा कञ्चनपुर घटनाका विषयमा जानकारी गराउँदै गर्दा गृहमन्त्री निधि रुनु भयो । गौतमलाई सहिद घोषणा गरेको जानकारी गराउँदै गर्दा निधिको गला अवरुद्ध भएको थियो । गला अबरुद्ध भएपछि उनी केही समय रोक्नु भएको थियो । कञ्चनपुर जिल्लाको दक्षिणी सिमाना नजिक आनन्द बजारमा कल्भर्ट निर्माण सम्बन्धमा नेपाल र भारतका सीमा अधिकारीबीच यही फागुन १० गतेको सहमति विपरीत भारतीय पक्षले कल्भर्ट भत्काएपछि उत्पन्न विवादमा भारतीय सुरक्षाकर्मीको गोली प्रहारबाट निर्दाेष गोविन्द गौतमको उपचारका क्रममा दुःखद् निधन भएको मन्त्री निधिले अवगत गराउनुभयो । उहाँले उक्त अकल्पनीय घटनाबारे गृह र परराष्ट्र मन्त्रालयले विज्ञप्ति जारी गरी धारणा स्पष्ट पारिसकेको जानकारी दिँदै भारतीय पक्षबाट गोली प्रहार हुनु निन्दनीय भएको बताउनुभयो । सोही विषयमा आफूले प्रधानमन्त्रीको निर्देशनमा भारतीय विदेशमन्त्री सुष्मा स्वराजसँग टेलिफोन गरी घटनाको छानबिन गर्न र दोषीमाथि कारबाही गर्न आग्रह गरेको उहाँले जानकारी दिनुभयो । यस्तै, परराष्ट्रमन्त्री डा प्रकाशशरण महतले पनि स्वराजलाई फोन गरी आइन्दा यस्तो घटना नदोहो¥याउन आग्रह गर्नुभएको र यहाँस्थित भारतीय दूतावासका कार्यबाहक राजदूतलाई परराष्ट्र मन्त्रालयले बोलाइ ध्यानाकर्षण गराएको पनि बताउनुभयो ।

सप्तरी ,२७ फागुन । आन्दोलनरत मधेशी मोर्चाका नेता तथा कार्यकर्ताहरुले सप्तरीको मलेठ गाविसस्थित सडक खण्डमा बन्द को अवज्ञा गरेको भन्दै वीरगञ्ज देखि राजविराज चल्ने स्वस्तिका ट्राभ्ल्समा एक यात्रु बाहक बसमा आगजनी गरेका छन । सोमबार सप्तरीमा प्रहरीले गोली चलाएको स्थानमै मोर्चाका कार्यकर्ताहरुले बिरगन्जबाट राजविराजतर्फ आउँदै गरेको ना. ५ ख. ६७१३ नम्बरको यात्रुबाहक बसमा आगजनी गरेका हुन । आगजनीबाट बस पूर्ण रुपले जलेको छ । बसका यात्रुहरुलाई ओरालेर सोही बसमा रहेको डिजल र पेट्रोल छर्केर आगो लगाएको जनाइएको छ । यता संयुक्त लोकतान्त्रिक मधेशी मोर्चा सप्तरीको आह्वानमा अनिश्चितकालिन बन्दको आज पाँचौं दिन पनि प्रदर्शन जारि रहेको छ भने संघीय गठबन्धनले आह्वान गरेको एक दिने नेपाल बन्दको पूर्ण प्रभाव परेको छ । यहाँबाट कुनै सवारीसाधन चलेका छैनन् भने पसल, कलकारखाना, उद्योग, बजार समेत बन्द रहेको छ । जिल्लाको भारदह, कंचनपुर, रुपनी, कल्याणपुर लगायतका स्थानहरुमा मोर्चाका कार्यकर्ताहरुले सडकमा टायर बालेर प्रदर्शनलाई निरन्तरता दिइरहेका छन् ।यसअघि हिजो मात्रै आन्दोलनकारीहरुले राष्ट्रिय मानवअधिकार आयोगकी सदस्य एवं प्रवक्ता मोहना अन्सारी चढेको बा. ७ च ७४७९ नम्बरको गाडीमा तोडफोड गरेका थिए । सो गाडीलाई पनि मलेठमै तोडफोड गरिएको थियो । सभार सरगम खवर