असोज १६, उदयपुर । उदयपुर जिल्ला अस्पताल को अपरेशन थिएटर डाक्टरहरु को सुत्ने ठाँउ/बेडको रुपमा परिणत भएको छ । अस्पतालमा डाक्टरहरुको लागि बस्ने क्वाटर नहुँदा डाक्टरहरुले बेडकै रुपमा थिएटरलाई प्रयोग गरेका हुन् । यहाँको अप्रेसन थिएटर बर्षौ देखि प्रयोगमा आउन सकेको छैन ।

२०७० सालबाट ५० शैय्यामा बृद्धि भएको जिल्ला अस्पताल मा दरबन्दी अनुसारको डाक्टरहरु को पदपुर्ती पनि हुन सकेको छैन भने कार्यरत डाक्टरहरु लाई आवश्यक पर्ने क्वाटर (बस्ने सुत्ने कोठा) नहुँदा डाक्टरहरु ले अस्पताल छाड्न थालेका छन् ।

अस्पतालमा कार्यरत डाक्टरहरुलाई बस्ने ठाँउनै नभएपछि उनीहरु अस्पताल नै छाडेर अन्यत्र जाने, सरुवा माग्ने र काज माग्न थालेपछि अस्पताल डाक्टरहरु बिहिन हुने अबस्थामा पुगेको अस्पताल स्रोतले बताएको छ ।

जिल्ला अस्पताल उदयपुरको प्रशासन शाखाले दिएको जानकारी अनुसार विभिन्न रोगका १४ चिकित्सको दरबन्दी भए पनि हाल दुई जना मात्र कार्यरत छन । अस्पतालमा एक मेडिकल सुपरिटेन्डेन्ट तथा कार्यालय प्रमुख डा. बिष्णुबहादुर बस्नेत र एक मेडिकल अधिकृत डा. बिशालकुमार देव मात्र रहेका छन् ।

चिकित्सक मात्र नभएर कार्यालय प्रमुखले समेत सुत्ने ठाउँनै आफ्नै कार्यकक्ष बनाउन बाध्य छन् । यस्तै करारमा नियुक्त भएका मेडिकल अधिकृत डा. अमृतकुमार चौधरी र राकेशकुमार बैठा समेत अप्रेशन थिएटरमा सुत्न बाध्य छन् ।

स्थानीय तहबाट गरिएको आग्रह र अनुरोधलाई मन्त्रालयले सुनुवाई नगरेका कारण चिकित्सक र क्वाटरको समस्या रहेको अस्पताल विकास समितिका अध्यक्ष शिव रेग्मीले बताए ।

अन्य जिल्लामा डाक्टरहरु को  आवस गृह सहितको तीन तल्ले भवन बनेपनि यस जिल्लामा त्यस्तो भवन नबनेकोले समस्या भएको उनले बताए । उसो त जिल्ला अस्पताल मा चिकित्सकको लागि आवश्यक क्वाटरको समेत समस्या हुँदा दरबन्दी अनुसारको चिकित्सक नभएको समितिका अध्यक्ष रेग्मीले बताए ।

अस्पताल का अनुसार तोकिएको दरबन्दी मध्ये एक दर्जन चिकित्सक दरबन्दीको पदपूर्ति हुन सकेको छैन । अस्पताल मा हाल सम्म प्रमुख मेडिकल अधिकृत, कन्सल्टेन्ट जनरल फिजिसियन अधिकृत, कन्सल्टेन्ट अब्स एण्ड गाईनो अधिकृत, कन्सल्टेन्ट अर्थोपेडिक सर्जन अधिकृत, पेडियाट्रिसियन अधिकृत, सर्जन अधिकृत, साईक्याट्रिष्ट अधिकृत र मेडिकल अधिकृत आठौं तहको दरबन्दी भएपनि कुनै विशेषज्ञ नआएको मेडिकल सुपरिटेन्डेन्ट डा. विष्णुबहादुर बस्नेतले बताए ।

अस्पतालमा एनेस्थेसियामा कन्सल्टेन्ट एनेस्थेसियोलोजिष्ट अधिकृत समेत नभएको प्रमुख डाक्टर बस्नेतले बताए । यसैगरी डेन्टल शाखामा पनि शुन्य छन् । फिजियोथेरापिष्ट लगायत अन्य अति आवश्यक कर्मचारी समेत नभएको डाक्टर बस्नेतले बताए ।

यता आवश्यकता अनुसार डाक्टरहरु उपलब्ध नहुँदा अस्पताल मा सेवा प्रभावित हुने गरेको सेवाग्राहीहरुको गुनासो छ । अस्पताल का अनुसार दैनिक १ सय ५० भन्दा बढी बिरामी आउने गरेका छन् । त्यसमा दैनिक सरदर एक दर्जनको हारहारीमा प्रसुती सेवा लिन आउने गरेका छन् । -एभेरेष्ट

दिनेश्वर गुप्ता लहान, १६ असोज । सिरहाको लहान स्थित रहेको मधेश मिडिया मिशन नेपालद्धारा संचालित सामुदायिक रेडियो सौगातले एफएमले छैठौं बार्षिकोत्सव धुमधामका साथ मनाइएका छन् । प्रेस काउन्सीलका सदस्य चन्द्रदेव कामतीका प्रमुख आतिथ्यमा भएको सो कार्यक्रमका सभाध्यक्षता दिनेश्वर गुप्ताले गर्नुभएका थिए । बार्षिकोत्सवको अवसरमा रेडियो सौगातले विभिन्न विद्यामा योगदान पुरयाउंने १५ जनालाई सम्मान गरिएको छ । सम्मानित हुनेहरु मो. रेहान राजा, दिनेश दास, अशोक ठाकुर, जावेद अलि, महमुद आलम, सत्यनारायण पंजियार, भारती गुप्ता, ज्योती विक, सृजना गजमेर, सोनु मिश्रा, फिरोज सेख, जीवछ यादव उदासी ,डा.बिजेन्द्र यादब , अर्जुन प्रसाद गुप्ता, उमेश साहलगायत श्रष्टाहरुलाई सम्मान गरेका छन् । कार्यक्रममा रेडियोले सानो समयमा ठुलो फड्को मारेको र सोहि कारणले स्थानीय स्तरमा लोकप्रियता कायम गरेको कार्यक्रमका वक्ताहरु रामबहादुर महतो, रोहीत महतो, गणेश साह, डा.विजेन्द्र यादव, रामभरोसी महतो, फिरोज सेख, रोयान्टर मण्डल, सुनिल साह, रेणु कर्णलगायतले शुभकामना दिएका थिए ।

भारतीय मिडियामा यतिबेला निकै अचम्म र नयाँ विषयमा चर्चा सुरु भएको छ । त्यहाँका मिडिया अनुसार भारतको कुण्डलीमा पाकिस्तानसँग युद्ध हुने योग देखिएको छ ।

सोसल मिडिया फेसबुकमा युद्ध सम्बन्धि यो भविष्यवाणी निकै चर्चित भइरहेको छ ।

भविष्यवाणीको दाबी अुनसार ग्रहको योगले भारत र पास्कितानबिचको युद्ध आउँदो अक्टोबर १० तारिखदेखि सुरु हुनेछ । युद्ध १८ नोभेम्बरसम्म हुने बताइएको छ ।

गुजरातका अहमदावादका चर्चित ज्योतिष व्यापक लोढ्हाको यो भविष्यवाणी सोसल मिडियामा चर्चित बनेको हो ।

भविष्यवाणीका अनुसार १० अक्टोबरदेखि १८ नोभेम्बरका बिच भारत र पाकिस्तानको युद्ध हुने छ। २० सेप्टेम्बरदेखि ३ अक्टोबरका बिच चरमपन्थी समूहसँग भारतीय सेनाको मुठभेद जारी रहनेछ । ३ अक्टोबरदेखि १५ अक्टोबरका बिच भारतले पाकिस्तानविरुद्ध ठूलो हमला गर्ने जसका कारण पाकिस्तानले ठूलो नोक्सानी व्यवहोर्नुपर्ने सम्भावना रहेको ।

यसका साथै १८ नोभेम्बरसम्म भारतले निर्णायक भूमिकामा युद्ध गर्नेछ । १४ अक्टोबरदेखि १५ नोभेम्बरसम्म भारतले आफ्नो यस्तो ताकत देखाउनेछ जसका कारण संसारले आफ्नो मध्यस्थता देखाउनुपर्नेछ । त्यसपछिको शान्तिवार्ता भारतको हितमा हुने पनि भविष्यवाणीले बताएको छ ।

भारतले यतिबेला ठूलै चर्चा गरिरहेको यो विषयमा प्रश्न यो उठ्छ कि के युद्धको भविष्यवाणी गर्न सकिन्छ ? यसबारे आउँदो दिनले नै बताउनेछ ।

हङकङ, २ अक्टोबर । हङकङमा नेपालीबीच ग्याङ फाईट भएपछि प्रहरीले स्थिति नियन्त्रणमा लिन कम्तीमा चार राउण्ड गोली चलाएको छ।

जोर्डनमा आइतवार बिहान करीव ६ बजे नेपाली युवाहरु छुरा हानाहान गरेपछि स्थिति नियन्त्रणमा लिन प्रहरीले गोली चलाएको हो। दुई समूह लडिरहेको खबर ट्याक्सी चालकबाट पाएपछि प्रहरी घटनास्थल पुगेको थियो।

प्रहरी पुग्दा पनि छुरा हानाहान जारी रहेपछि प्रहरीले गोली चलाउंदा दुई जना गम्भीर घाइते भएका छन्। उनीहरुलाई उपचारको लागि क्वीन एलिजावेथ हस्पिटलमा लगिएको छ।

एक जनाको कमर र खुट्टामा गोली लागेको छ भने अर्काको पाखुरामा गोली लागेको र छुरा प्रहारबाट टाउकोमा गहिरो चोट लागेको जनाइएको छ। घटनामा संलग्न युवाहरुको परिचय नखुलाईए पनि उनीहरु हङकङ आईडी होल्डर नेपाली रहेको एचके अन सीसीले जनाएको छ।

काठमाडौं,  १६ असोज । केन्द्रीय बैंकले सर्वसाधारणका लागि आइतबार (आज) बाट नयाँ नोट वितरण सुरु गरेको छ । नयाँ नोट वितरणका लागि नेपाल राष्ट्र बैंक मुद्रा व्यवस्थापन विभाग थापाथलीले ९ वटा काउन्टरको व्यवस्था गरेको छ ।

जेष्ठ नागरिक, अपांग, अशक्तका लागि एउटा छुट्टै काउन्टरको व्यवस्था गरिएको छ । यसैगरी, तोक आदेश लिएर नयाँ नोट साँट्न आउनेलाई पनि छुट्टै काउन्टर राखिएको छ ।

सर्वसाधरणका लागि ६ वटा काउन्टरको व्यवस्था गरिएको राष्ट्र बैंक मुद्रा व्यवस्थापन विभागका प्रमुख भुवन कँडेलले बताए ।

विभागले लाइन कसेका सर्वसाधरणलाई कुपन वितरण गर्ने र त्यसै कुपनको आधारमा नयाँ नोट वितरण गर्नेछ । आजको नागरिक दैनिकमा खबर छ ।