सिरहामा इनारमा निस्सासिएर दुईको मृत्यु

राम नारायण पंडित, सिरहा, २५ साउन । सिरहाको धनगढीमाई नपा–१२ विष्णुपुरकट्टीमा इनारमा निस्सासिएर दुई जनाको मृत्यु भएको छ । इनार भित्र झरेको वाल्टिन निकाल्न पसेका ३० वर्षिय जागेश्वर मण्डल इनार भित्र झरेपछि उनलाई बचाउन पसेका काका रामविलास मण्डलको पनि निस्सासियर आज (मंगलबार) मृत्यु भएको हो । आफ्नै घर नजिक रहेको इनारमा पानी भरिरहेको वेला बाल्टिन झरेपछि निकाल्न पसेका जागेश्वर निस्सासीएर पानीमा झरेपछि उनलाई निकाल्न पस्दा काका रामविलास पनि निस्सासिएर पानीमा डुवेको जिल्ला प्रहरी कार्यालय सिरहाका प्रमुख एसपी श्यामलाल ज्ञवालीले जानकारी दिए । इनारमा पस्दा दुवै जना निस्सासिएर झरेपछि गाउँलेहरु डराएर उद्धारको लागि भित्र नपसेको स्थानीयले बताएको छ । उद्धारकोे लागि प्रहरीलाई खवर गरेपनि दुई घण्टा ढिलो गरी प्रहरी घटनास्थलमा पुगेका थिए । लहानबाट गएको जनपथ प्रहरी र सशस्त्र प्रहरीको विपद व्यवस्थापन टोलीले इनारबाट शव निकालेको प्रहरीले जनाएको छ । दुवै शव पोष्टमार्टमकोलागि लहानस्थित रामकुमार सारडा उमाप्रसाद मुरारका स्मारक अस्पतालमा राखिएको छ ।