Onlinesiraha-Nepali

प्रविधिको सुरुवात ः कम्प्युटरबाटै मालपोत कार्यालयले लालपुर्जा दिए

Posted: 18 Jul 2016 10:45 PM PDT

एसके कामति
सिरहा, साउन ४ गते/नयाँ आर्थिक वर्ष सुरु भएसँगै मालपोत कार्यालय सिरहाले कम्प्युटर प्रणालीको प्रयोग थालेको छ ।
सिरहा मालपोत कार्यालयको कार्यक्षेत्रमा रहेको जिल्लाको चारवटा नगरपालिका अन्र्तगतका सेवाग्रहीलाई कम्प्युटर प्रणालीबाट लालपुर्जा वितरण थालिएको छ । सिरहा, रामनगर मिर्चैया, असनपुर गोलबजार र सुखिपुर नगरपालिका (पूराना ३० गाविस) का सेवाग्रहीलाई कम्प्युटर प्राणलीबाटै लालपुर्जा दिन थालेपछि सेवाग्रही हर्षित भएका छन् । नयाँ आर्थिक वर्षको पहिलो दिन कार्यालयले पाँच वटा लालपुर्जा जारी गरेको कार्यालय प्रमुख ज्ञानराज लम्सालले बताए । २०६८ सालमा यी गाविस र नगरपालिकाहरुको तथ्यांक इन्ट्री गरिसकेपनि लालपुर्जा जारी गर्ने कार्य बल्ल सुरु भएको हो ।
कार्यालयले सिरहा नगरपालिका १२ सारस्वरका लिलादेवी मण्डलले बेचेको २ कट्ठा ५ धुर जग्गाको लालपुर्जा दिलिप मण्डलको नाउँमा जारी गरेको छ । यस्तै सुखिपुर नगरपालिका ९ का बनौधी सदाले बेचेको १ कट्ठा ५ धुर जग्गाको लालपुर्जा रामचन्द्र साहको नाउँमा, मिर्चैया नगरपालिका ६ फुलबरीयाका रामकुमार साहले बेचेको ५ धुर जग्गाको लालपुर्जा विन्दी कुमारी साह र असनपुर गोलबजार नगरपालिका १२ का धनीराम रायले बेचेको १ कट्ठा ११ धुर जग्गाको लालपुर्जा रामराजी मण्डलको नाउँमा कम्प्युटर प्रणालीबाट जारी गरिएको सहायक कम्प्युटर अपरेटर रामकुमार यादवले बताए ।
६ नगरपालिका र ६३ गाविस रहेको सिरहा जिल्लामा कार्यालयले सेवाग्रहीलाई कम्प्युटर प्रणालीबाट लालपुर्जा वितरण गरेपछि कम समय लाग्ने र किर्ते गर्न नसकिने कार्यालयको दाबी रहेको छ । कम्प्युटरबाटै मोठ भिराएपछि रजिष्ट्रेशन पास गरिएको प्रमुख लम्सालको भनाई छ । यसरी लालपुर्जा कम्प्युटर प्रणालीबाट जारी गर्दा सेवाग्रहीलाई निकै सजिलो हुने र अतिरिक्त कागजहरु राख्नुपर्ने भार पनि न्यून हुने प्रमुख लम्सालको दाबी छ । सुरुमा केही असहज महसुस भएपनि आउँदा दिनहरुमा यो निकै प्रभावकारी हुनेछ ।

हतियार सहित युवक पक्राउ

Posted: 18 Jul 2016 10:23 PM PDT

एसके कामति सिरहा, साउन ३ गते । सशस्त्र प्रहरीले हतियार सहित एक युवकलाई पक्राउ गरेको छ । सिरहाको गोलबजारमा बेच्न लगिएको हतियार प्रहरीको टोलीले गोप्य सूचनाको आधारमा बरामद गरेको छ । सशस्त्र प्रहरी सिमा सुरक्षा कार्यालय सिरहाबाट खटिएको प्रहरी टोलीले गोलबजार नगरपालिका ४ मा रहेको जानकी पेट्रोल पम्प नजिकैबाट राम गणेश बेलदासलाई फक्राउ गरेको हो । पक्राउ परेका गोलबजार नगरपालिका १६ का १८ वर्षिय बेलदासको ब्यागबाट सशस्त्र प्रहरीले सिक्सर पेस्तोल १ थान र सोमा लाग्ने २ राउण्ड गोली बरामद गरेको सशस्त्र प्रहरीका एसपी सुवर्ण थापा मगरले बताए । बेलदासले प्रयोग गरेको स ५ प २२३ नम्बरको पल्सर मोटरसाईकल, नेपाल टेलिकम र एनसेलको रिमकार्ड, केही नगद, भारतको दिल्लीमा खिचाएको तस्वीरहरु समेत बरामद गरेको एसपी थापाले बताए । पक्राउ परेका बेलदासले हतियार आफ्नो नभएको र अपरिचित युवाहरुले झोलामा राखि दिएको हुन सक्ने आशंका व्यक्त गरे । आफू जनता उच्च माध्यमिक विद्यालय गोलबजारको १० कक्षाको विद्यार्थी भएको र कुनै अपराधिक कार्यमा संलग्न नभएको दाबी गरेका छन् । तर सशस्त्र प्रहरीले उनी बरामद भएको हतियार बेच्न ग्राहकलाई खोज्ने क्रममा पक्राउ परेको एसपी थापाले बताए । सिरहामा साना हतियारको तस्करी भईरहेको गोप्य सुचना पाएको सशस्त्र प्रहरीले पछिल्लो समय चेकजाँचमा कडाई गरेको छ । एसपी थापाले भन्छन्, 'सिरहामा साना हतियारको ओसारपोसार वढ्ेको सूचना आएको छ । त्यसलाई निस्तेज पार्न प्रहरीको सक्रियता वढाएको छु ।' यस अघि पनि सशस्त्र प्रहरीले सिमातर्वी भारतको विभिन्न बजारबाट नेपाल भित्र्याएको साना हतियार बरामद गरेको छ ।