फाल्गुन १४ । सिरहामा छाडा छोडिएको राँगाले हानेर शुक्रबार एक महिलाको मृत्यु भएको छ भने एक जना घाईते भएकी छन्।औरही पिप्रा गाविस-१ बस्ने ६५ बर्षिया मुसर्नी देवी साहलाई आफ्नै घरमा बसिरहेको अबस्थामा अचानक छाडा रांगाले आक्रमण गरेको थियो।राँगाको आक्रमणबाट गम्भिर घाइते साहको उपचारकोलागी लैजाने क्रममा बाटैमा मृत्यु भएको थियो। यसैगरी लहान नगरपालिका १५ स्थित ढोड्ना खोलामा राँगाले हानेर सोहि स्थान बस्ने ४० बर्षिया अनिता चौधरी घाईते भएकी छन्।चौधरीलाई बजारबाट घर फर्कने क्रममा राँगोले हानेर गम्भिर घाईते भई फ्रेन्स मोडल अस्पताल लहानमा उपचार भईरहेको सिरहा प्रहरीले जनाएको छ।

फाल्गुन १४। सिम्रौनगढमा प्रधानमन्त्री प्रचण्डको कार्यक्रम र एमालेले चलाउने भनिएको मेची-महाकाली अभियान विथोल्ने मधेसी मोर्चा बारा र पर्साको संयुक्त बैठकले निर्णय गरेको छ । बाराको नौतन गण्डकस्थित मधेस सेवा आश्रममा बसेको मोर्चाको संयुक्त बैठकबाट यस्तो निर्णय भएको हो । प्रधानमन्त्री प्रचण्ड र एमालेको मेची महाकाली अभियान बिथोल्ने निर्णय भएपनि फागुन १९ गते जीतपुरमा अन्तरक्रिया गरी रणनीति बनाउने मोर्चाले जनाए । अगामी सोमबार प्रधानमन्त्री प्रचण्ड सिम्रौनगढ आउने कार्यक्रम छ भने एमालेले फाल्गुन २७ गते बाराको जीतपुरमा एमालेले मेची– महाकाली अभियान अन्तर्गत सभा गर्ने कार्यक्रम तय भएको छ । मोर्चाको संयुक्त बैठकले मधेसी विरोधी नेताहरु विरुद्ध पर्सा/बाराको गाउँ–गाउँमा भण्डाफोर कार्यक्रम चलाउने निर्णय पनि गरेको तराई मधेस लोकतान्त्रिक पार्टीका प्रवक्ता रमेश सर्राफले बताए । बैठकमा पर्साबाट प्रदीप यादव, शशीकपूर मियाँ, पुरुषोत्तम झा, प्रेमबाबू पटेललगायत तथा बाराबाट प्रमोद गुप्ता, रामबाबू यादव, जीतेन्द्र सोनल, नवलकिशोर सिंह, महमद सफिक, धर्मेन्द्र यादव, राजेश यादवलगायतको उपस्थिति थियो ।

फागुन १४ - जनकपुरमा केहि दिन देखि अपराधिक क्रियाकलाप बढ्दै गएको छ । यसै बीच जनकपुरमा सनिबार बिहान एक युवक माथि छुरा प्रहार भएको छ । मोरंग जिल्ला विराटनगर बरगाछी वडा नं. ३ बस्ने मो.सलिम नदाफ माथि युवाका एक समुहले छुरा प्रहार गरि घाइते बनाएका छन्। जनकपुर उमहानगरपालिका वडा नं. २ विद्यानगर स्थित आफनो दिदी भिनाजु सँग बस्दै आएका सलिम लाई व्यक्तिगत रिसवीका कारण विवाद हुँदा छुरा प्रहार गरिएको प्रहारले जनाएका छन्। यसबीच छुरा प्रहार गरेको आरोपमा १८ वर्षीय गोपाल ठाकुर नाम भएको एक युवक लाई पक्राउ गरिएको छ । घाईते सलिमको उपचार जनकपुर अञ्चल अस्पतालमा भइरहेको छ भने अवस्था समान्य रहेको प्रहरीले जनाएको छ।घटनामा संलग्न अन्य युवाहरु फरार भएकाले खोजी कार्य भइरहेको प्रहरीले जनाएको छ । गत फागुन ११ गते जनकपुरमै एक युवकको आपसी विवादका कारण घाटीरेटी हत्या गरिने प्रयास भएको थियो।