राम नारायण पंडित, सिरहा, २० मंसिर । सिरहाको अचन्द्रअयोध्यापुर १ स्थित विल्टु डोम र वेचु डोमको घर शनिवार भत्काएपछि डोम परिबार विचल्लीमा परेका छन् । विगत ४० वर्षदेखि वस्दै आएका डोम समुदायलाई जाडोको मौसममा स्थानीय भरतराज शर्माले घर भत्काएपछि डोम परिबार समस्यामा परेका हुन् । घरभत्काउने क्रममा उनीहरुले मरिक परिवारमाथि हातपात समेत गरेको जनाएको छ ।

घर भत्काएकाएपछि तराइका अति विपन्न समुदायका डोम परिवारका १८ जनाको परिवार खुल्ला आकाशमुनी रात विताउन बाध्य भएका छन् । संजय डोमका अनुसार भरतले २५÷३० जनाको समूहमा ल्याएका अपरिचित युवाहरुले भर भत्काएको हो । प्रहरीकै अगाडी गुण्डा शौलीमम घर भत्काउँदा समेत प्रहरीले केही नगरेको उहाँहरुले गुनासो गरेका छन् । यता, भरतराज आफ्नो जमिन भएको भन्दै डोम परिवारको घर अदालतको आदेशमा भत्काएको बताएको छ । २०३५ सालदेखि बस्दै आएको डोम परिवारलाई त्यहाँबाट विस्थापीत गर्ने नियत सहित शर्माले ७÷८ वर्ष अघि जमिन खरिद गरेको स्थानीयले बताएको छ । स्थानीय व्यवसायी तथा समाजसेवी कुलिया यादवले डोमपरिवार बसेको देखि देखि भरतले जमिन किनेर डोम परिवारमाथि अन्याय गरेको बताए । भरतले अदालतमा जमिन चलन गरिपाउँ भनी मुद्दा लगाएको भएपनि आफूहरुले यस वारेमा कुनै जानकारी नपाएको मरिक परिवारले बताएको छ । यता, इलाका प्रहरी कार्यालय मिर्चैयाले आफूहरुलाई  घटनावारे जानकारी नभएको भन्दै, पीडित परिवारलाई तत्काल बासको व्यवस्था मिलाउन पहल थालेको बताएको छ । प्रहरीको एक टोली घटनास्थलमा पुगेर  तत्काल मरिक परिवारलाई बासको लागि त्रिपालको व्यवस्था गर्न भरतराजलाई भनेको प्रहरीको भनाई रहेको छ । बाँसका सामाग्री बनाएर गुजारा चलाउँदै आएका डोम परिवारको जमिन समेत आफ्नो नाममा छैन । उनीहरु वर्षौंअघि बाँझो जमिन सफापारी बसेको बताइएको छ ।

संजय बिश्वकर्मा मंसिर १९,लहान । पुर्ब पश्चिम लोकमार्ग अन्तर्गत माईक्रो ठक्करबाट एक जन साईकल यात्रि गम्भिर घाईते भएको छ । घाईते हुनेमा सिरहा लहान नगरपालिका वडा नं. ३ बस्ने १८ बर्षिय हरेराम महतो रहेको प्रहरीले जानकारी दिनुभयो । पुर्बबाट पश्चिम काठमाण्डौ जादै गरेको बा.३ख. ८४४५ नं. एस हाईस माईक्रोबसले सोहि दिसाबाट आउदै गरको साईकल यात्री लाई पछाडीबाट ठक्कर हानी गम्भिर घाईते बनाएको हो । घाईतेलाई लहान स्थित रहेको लिला मदन पोलिक्लिनीक एण्ड प्रसुती गृहमा समान्य उपचार पछी थप उपचारको लागी बिराटनगरको न्युरो हस्पिटल लगीएको लिला मदन पोलि क्लिनिक लहान का डा. राजन साहले बताए । घाईते महतो टाउकोमा गम्भिर चोट लागी टाउको फुटोको साथै घाईतेको अबस्था चिन्ताजनक रहेको छ । ठक्कर दिने गाडी ,चालक ईलाका प्रहरी कार्यालय लहानको नियन्त्रणमा रहेको प्रहरीले जनाएको छ ।

दिनेश्वर गुप्ता लहान १७ मंसिर । विश्वभर विभिन्न कार्यक्रम गरी आज डिसेम्बर १ अर्थात विश्व एड्स दिवस मनाइएको छ । सिरहालगायत नेपालभर विभिन्न जनचेतनामुलक कार्यक्रमको आयोजना गरी २९औं एड्स दिवस मनाइएको छ । 'हामी सबैको काम, एचआईभी रोकथाम' भन्ने नाराका साथ यो दिवस सिरहा पनि मनाइयो । सोहीक्रममा आर्थिक वर्ष ०७२।७३ मा सिरहामा थप २६ जना एचआइभी संक्रमित फेला परेको एक तथ्यांकले सार्वजनिक गरेको छ । सिरहामा एचआइभी एड्सकै कारण सिरहामा गत आर्थिक वर्ष ०७२।७३ सम्म १४ जनाको मृत्यु भएको थियो । लहान अस्पतालमा २० र सिरहा अस्पतालमा ६ जना नयाँ एचआइभी संक्रमित फेला परेको जिल्ला जनस्वास्थ्य कार्यालय सिरहाका एचआइभी एड्स समन्वय समितिका सरोज कर्णले जानकारी दिए । योसँगै सिरहामा एचआइभी संक्रमितको संख्या ६८ पुगेको छ । अघिल्लो आर्थिक वर्ष ०७१।७२ मा पनि १५ जना नयाँ एचआइभी संक्रमित फेला परेका थिए । एचआइभी संक्रमितमध्ये ४२ जनालाई उपचारका लागि धरानस्थित बिपी कोइराला स्वास्थ्य विज्ञान प्रतिष्ठान र जनकपुर अस्पताल पठाइएको कर्णले बताए । एचआइभी र एड्स सम्बन्धी प्रभावकारी रोकथाम, हेरचाह, सहयोग तथा उपचार सेवाको लागि विश्वव्यापी ध्यानाकर्षण गर्दै वृहत रुपमा जनचेतना जगाउने र भावी कार्यक्रमको लागि बहुपक्षीय संलग्नता बढाउने अभिप्रायले सन् १९८८ देखि हरेक वर्ष डिसेम्बर एक तारीखका एड्स दिवस मनाउने गरिन्छ । विश्वमा एचआइभी पत्ता लागेको ३५ वर्ष पूरा भएसँगै नेपाल लगायत विश्वमा एचआइभीको नयाँ संक्रमणमा कमी आएको राष्ट्रिय एड्स तथा यौन रोग नियन्त्रण केन्द्रले जनाएको छ । केन्द्रका अनुसार सन् २०१५ सम्ममा विश्वमा एड्स रोगका विरामीको संख्या तीन करोड ६७ लाख रहेको अनुमान गरिएको छ भने नेपालमा हाल करिब ३९ हजार ३९७ जनामा एचआइभीको संक्रमण रहेको अनुमान छ । जसमा पुरुषको संख्या चौबीस हजार ४४९ र महिलाको संख्या चौध हजार ९४८ रहेको छ । त्यस्तै नेपाली संक्रमितमा १५ देखि ४९ वर्ष समूहका वयष्क जनसंख्या मध्ये ०.२ प्रतिशतमा मात्र एचआइभीको संक्रमण रहेको अनुमान छ । नेपालमा करिब ८५ प्रतिशत एचआईभी संक्रमण असुरक्षित यौनसम्पर्कबाट हुने गरेकोे पाइएको छ । एचआइभीको उच्च जोखिममा रहनेहरुमा सुईद्धारा लागुऔषध प्रयोग गर्ने र पुरुष समलिंगी यौनकर्मीहरुमा एचआईभीको संक्रमण हुने जोखिम उच्च रहेको पाइएको छ । त्यस्तै यौनकर्मी, तेश्रोलिंगी, वैदेशिक रोजगारीमा जानेहरु र कैदीहरुमा पनि संक्रमणको जोखिम उच्च रहेको केन्द्रका निर्देशक तरुण पंगेनी बताउँछन् । हाल नेपालमा एड्सको नयाँ संक्रमणमा ८० प्रतिशतले र एड्स सम्बन्धी मृत्युमा सन् २००७ (नेपालमा एड्सबाट सबैभन्दा धरै मृत्यु भएको वर्ष)को तुलनामा २२ प्रतिशतले कमी आएको छ । त्यसैगरी, एआरभी अर्थात औषधी सेवन गर्नेको संख्या १४६ प्रतिशतले बढेको तथ्यांकले देखाएको छ । त्यस्तै, सन् २००० को तुलनामा हाल विश्वमा एड्स रोगको नयाँ संक्रमणमा ३५ प्रतिशतले कमी आएको छ भने झण्डै ५८ प्रतिशत बालबालिकामा नयाँ संक्रमण कम हुदै गएको तथ्यांकमा उल्लेख छ । त्यसैगरी, सन् २००४ (विश्वमा एड्सबाट सबैभन्दा धेरै मृत्यु भएको वर्ष) को तुलनामा हालसम्म एड्सबाट मृत्यु हुनेमा ४२ प्रतिशतले कमी आउनुका साथै ८४ प्रतिशतमा एचआइभी (औषधी सेवन गर्नेको ) उपचामा पहुँच बढेको छ । हाल संसारमा १ करोड ५८ लाख मानिसहरु एचआइचीको उपचारमा रहेको विभिन्न तथ्यांकहरुले देखाएको छ ।

दिनेश्वर गुप्ता लहान, १७ मंसिर । सन् २०१७ सम्ममा नेपाललाई खुला दिशामुक्त क्षेत्र घोषणा गर्ने लक्ष्य अनुरुप सिरहामा हालसम्म ७० प्रतिशतले चर्पी निर्माण गरिसकेको छ । सिरहा जिल्ला सन् २०१६ भित्रै खुला दिशामुक्त क्षेत्र घोषणा गर्ने भनी अभियान चलाइएको छ । सोही अभियान अन्तरगत सञ्चालित कार्यक्रमलाई प्रभावकारी बनाउंनको निम्ति 'बाटो हगुवा नियन्त्रण' अभियान शुरु गरिएको छ । जिल्ला विकास समिति सिरहाको जिल्ला खानेपानी तथा सरसफाई समन्वय समितिले खुला स्थान र सडकमा दिसापिसाब गर्नेलाई नियन्त्रण लिएर कान समातेर उठबस जस्ता कार्य बढाउंदै चेतनामुलक कार्य अघि बढाइएको छ । बिहीबार मात्र सो अनुगमन टोलीले १३ जनालाई नियन्त्रणमा लिएर 'कान समातेर उठबस' गर्न लगाएको छ । सिरहा नगरपालिका वडा न.८ को मैसोथा टोलमा सडक छेउमै दिसा गरिरहेका उनीहरुलाई सो टोलीले नियन्त्रणमा लिएको थियो । टोलीले नियन्त्रणमा लिएकाहरुलाई खुला दिसा नगर्न आग्रह गर्दै शौचालयमा मात्र शौच गर्न सुझाएको थियो । 'हामीले टोली बनाएरै बिहानै ५ बजेदेखि अनुगमनमा निस्कने गरेका छौ ।' अनुगमन टोलीका सदस्य समेत रहेका नेपाल पत्रकार महासंघ सिरहाका अध्यक्ष देवकुमार यादवले भने, 'पुरुष मात्र होइन, महिलाहरु पनि लाजै नमानी खुला स्थानमा दिसा गर्छन् । मधेशमा यस्तो पौराणिक क्रियाकलाप रहेकोले यसलाई हामी हटाएरै छाड्छौ ।' समन्वय समितिले सन् २०१६ को अन्त्यसम्ममा सिरहालाई खुला दिसा मुक्त क्षेत्र बनाउने लक्ष्य लिएको छ । तर सो लक्ष्य ७० प्रतिशत मात्र पुरा भएको छ । यता, हालसम्म नेपालभर ३८ जिल्ला खुला दिशामुक्त क्षेत्र घोषणा भएको छ भने ८ जिल्ला तयारीमा रहेको एक तथ्यांकले सार्वजनिक गरेको छ । लक्ष्य अनुरुप देशभर ८३ प्रतिशत खुला दिशामुक्त क्षेत्र घोषणा भइसकेको छ भने मधेशको सप्तरीदेखि पर्सासम्म ८ जिल्ला पछाडि परेको छ । जसमा सिरहा अग्रपंक्तिमा रहेको छ ।

दिनेश्वर गुप्ता लहान, १५ मंसिर । लागुऔषध न्यूनिकरणमा जोड दिंदै जिल्ला प्रहरी कार्यालय सिरहाका एसपी शेखर कोईरालाले सिरहामा शान्ति सुरक्षाको लागि निरन्तर सक्रिय रहने बताउंनुभयो । आज सिरहामा पत्रकार भेटघाट कार्यक्रममा सो कुरा बताउंदै मुस्कानसहितको प्रहरी सेवामा सक्रिय रहने एसपी कोइरालाले बताउंनुभयो । एसपी श्याम ज्ञवाली सिरहाबाट सरुवा भएर गएपछि एक सत्तादेखि एसपी शेखर कोइराला जिल्ला प्रहरी कार्यालय सिरहामा आउंनु भएका छन् । सोहीक्रममा पत्रकार भेटघाट तथा परिचयात्मक कार्यक्रम सम्पन्न गरेको छ । कार्यक्रममा एक पत्रकारले लहानको तरकारी बजार हुंदै जाने बाटो, भोटिया टोल फुलवारी मेलाको बाटो हुंदै लागुऔषधको कारोबार हुने गरेको चर्चा गर्नुभएका थिए । त्यसैगरी, अर्का पत्रकारले सगरमाथा यातायात कार्यालय अगाडि केही मान्छेले दिउंसै ड्रग्स, रक्सी सेवन गरी सेवाग्राहीलाई कुटपिट गर्ने गरेको चर्चा गरेका थिए । यस्ता घटनालाई यथाशिघ्र नियन्त्रण गर्न समेत एसपी कोईरालाले प्रतिबद्धता जनाएका छन् । सोहीक्रममा जल्ला प्रहरी कार्यालय सिरहाका कार्यालयका एसपी कोईरालाले ईलाका प्रहरी कार्यालय माडर, प्रहरी चौकी लगडीगोठ, लगडि गदियानी र सन्हैठा समेतमा निरीक्षण गर्नुभएका छन् । उक्त निरीक्षणका क्रममा सम्बन्धित प्रहरी कार्यालयमा कार्यरत प्र.क.हरुलाई शान्ति सुरक्षा तथा सीमा नाकाहरुमा हुने अपराध न्यूनिकरण तथा रोकथामको लागि आवश्यक निर्देशन समेत दिई सम्बन्धित सीमा नाकाहरु तथा पिलरहरुको स्थलगत निरीक्षण तथा स्थानीय नागरिकहरु संग भेटघाट गरी प्रहरी सक्रियताका बारेमा राय सुझाब समेत लिनु भएका छन् ।

राम नारायण पंडित, सिरहा, १५ मंसिर । सिरहा प्रहरीले प्रतिबन्धित लागुऔषध सहित पाँच जनालाई पक्राउ गरेको छ । लुकाईछिपाई राखेको अवस्थामा लहानको एक गृल पसलबाट एक सय चार वोतल प्रतिवन्धित लागुऔषध कोरेक्स सहित पाँच जनालाई पक्राउ गरेको इलाका प्रहरी कार्यालय लहानले जनाएको छ । लहान २ मा मो. मुर्तुजाले संचालन गरेको गृल पसल पछाडी प्लाष्टिकको गिलेनमा लुकाई राखेको अवस्थामा प्रहरीले लागुऔषध कोरेक्स वरामद गरेको हो । प्रहरीले विशेष सुराकको आधारमा लागुऔषध सहित लहान २ का २१ वर्षिय मो. तैयब बावु, वर्ष ३६ का मो समीम, वर्ष २२ का रोहित साह सुडी, लहान ३ का ४१ वर्षिय विष्णुदेव साह र सप्तरी मौवाहा घर भई हाल लहान १ मा वस्दै आएका ४० वर्षिय शंकर ठाकुरलाई पक्राउ गरेको जनाएको छ । उनीहरुले विक्रि वितरणको लागि ल्याएर राखेको हुन सक्ने अनुमान रहेको इप्रका लहानका प्रमुख डिएसपी राजकुमार केसीले बताए । पक्राउ परेका सवैलाई लागुऔषध प्रयोग तथा ओसार पोसार अभियोगमा मुद्दा चलाउने तयारी भईरहेको जनाएको छ ।

दिनेश्वर गुप्ता लहान ११ मंसिर । समाजमा जनचेतनाका कार्यक्रम संचालन हुन थालेपछि हिंसात्मक घटनामा केही कमि आएको छ । ओरेक नेपाल लहानले आज पत्रकार सम्मेलनमा सो तथ्यांक सार्वजनिक गरेको छ । ओरेक नेपालकी सिरहा संयोजक निलम यादवका अनुसार विगतका बर्ष १ सय ७३ वटा महिला हिंसाका घटना रहेको थियो भने यस बर्ष ४८ जति कम रहेको बताउंनुभयो । २०१६ जनवरीदेखि २४ नोभेम्बरसम्म १ सय २५ वटा महिलामाथी हिंसाका घटना भएको छ भने गत बर्ष १ सय ७३ हिंसाका घटना भएको थियो । यस बर्ष घरेलु हिंसा १० , बलात्कार ५ , यौन हिंसा ६ , आत्महत्या ४ , मानसिक यातना २४ , कुटपिट ५४, दाईजो कारण मानसिक यातना ३ , बोक्सीको आरोप ६ र बहुविवाह १० वटा रहेको पत्रकार सम्मेलन जानकारी गराएका छन् । सोहीक्रममा ओरेकले सिरहामा परामर्श ३४, मेलमिलाप ३५, स्वास्थ्य उपचारको सहजिकरण ६, कानुनी प्रक्रिया २३, प्रमाण नभएको ४, प्रहरी अनुसन्धान १८, अदालती ५, अंश मुद्दा १, बहुविवाहको मुद्दा १, कुटपिटको मुद्दा १ र बलात्कारको मुद्दा २ वटामा सेवा प्रदान गरिएको जनाइएको छ । ओरेक नेपालले महिला हिंसा विरुद्धको १६ दिने अभियानको कार्यक्रम समेत सो पत्रकार सम्मेलनमा सार्वजनिक गरेको छ । मंसिर ९ गतेदेखि २४ गतेसम्म १६ दिने कार्यक्रम अन्तर्गत पत्रकार सम्मेलन, र्याली प्रदर्शन, स्कूल तथा कांलेज शिक्षा, दहेज विरुद्ध सडक नाटक, सरोकारवालाबीच अन्तरक्रिया, हिंसा विरुद्ध अन्तरक्रिया, विश्व एड्स दिवसमा चेतनामुलक कार्यक्रम, भूमिमा महिलाको अधिकार विषयक अन्तरक्रिया, महिला स्वास्थ्य शिविर, यौनजन्य हिंसा विरुद्ध अन्तरक्रिया, आत्महत्या विषयमा कार्यशाला गोष्ठी, दहेजका कारण महिलामाथी हुने हिंसा विषयक अभिमुखिकरण, घटेका घटनाहरुको अनुभव आदानप्रदान, कोणसभा तथा रक्तदान जस्ता कार्यक्रम अघि सार्ने ओरेककी देवकुमारी महराले बताइन् । आजको कार्यक्रममा दहेज विरुद्ध व्यापक छलफल भएको छ ।

राम नारायण पंडित, सिरहा, ०९ मंसिर । सिरहाको मिर्चैयामा "स्वच्छ मिर्चैया, स्वस्थ्य मिर्चैया" को दोस्रो सप्ताहको सरसफाइ कार्यक्रम सम्पन्न भएको छ । सप्ताहिक सरसफाइ कार्यक्रम अन्र्तगत आज (विहिवार) उद्योग बाणिज्य संघ मिर्चैया र मिर्चैया नगरपालिकाको सहकार्यमा मिर्चैयाको थाना चौकदेखि कटारी चौकसम्म सरसफाइ गरिएको छ । सम्पुर्ण मिर्चैयाबासीहरुलाई दिनको कम्तिमा १० मिनेट समय सरसफाई तथा फोहोरमैला ब्यबस्थापनमा दिई "स्वच्छ मिर्चैया, स्वस्थ्य मिर्चैया" अभियानलाई सफल पार्न मिर्चैया नगरपालीकाका कार्यकारी अधिकृत रमेश कुमार दासले आग्रह गरेका हुन् । प्रत्येक बिहिबार सम्पुर्ण मिर्चैयाबासीहरु एकजुट भई सरसफाई तथा फोहोरमैला ब्यबस्थापन गरे एक बर्ष भित्र मिर्चैया नगरपालिकालाई स्वच्छ र सफा बनाउन सकिने मिर्चैया उद्योग बाणिज्य संघका अध्यक्ष हरीशंकर साहले बताए । कार्यक्रममा मिर्चैया नगरपालिकाका, उद्योग बाणिज्य संघ, ईलाका प्रहरी कार्यालय र सशस्त्र प्रहरी बल बेश क्याम्पको साथै ब्यापारी, स्थानियबासी, बुद्धिजिबि, नागरिक समाज, पत्रकार लगायत विभिन्न क्षेत्रका ब्यक्तिहरुको उल्लेखनिय सहभागिता रहेको मिर्चैया नगरपालिकाका खरिदार राजगिर यादबले बताए ।

नागरिक दैनिकका सिरहा संवाददाता मिथिलेश यादवमाथि सोमबार साँझ ४ः३० बजे लहानमा समाचार संकलनको क्रममा लिला मदन पोलिक्लिनिकका कर्मचारीले आक्रमण गरेका छन् ।उक्त पोलिक्लिनिकमा उपचार गराइरहेका इटाटार कमलपुरका एक जना विरामीका आफन्तले सो अस्पतालले अन्याय गरेको भन्दै समाचार संकलनका लागि बोलाएपछि सो ठाउ पुगेका पत्रकार यादवमाथि पोलिक्लिनिकका सञ्चालक मनोज साह, डाक्टर दिलिप कुमार र कर्मचारी धनन्जय यादवले हातपातको प्रयास गर्दै सञ्चारको साधन फुटाएको हो । पत्रकार यादवका अनुसार समाचारका सामग्री रेकर्ड गरिएको आफुसंग भएको आइ फोन पोलिक्लिनिकका सञ्चालक मनोज र डा. दिलिपको आदेशमा अस्पतालका कर्मचारी धनन्यले जर्वजस्ती खोसेर फुटाइदिएको हो ।

ईजाजत विना पनि यहाँका निजि अस्पताल तथा क्लिनिकहरुले विभिन्न रोगको उपचार गर्ने बहानामा विरामीबाट मोटो रकम असूली रहेको केही दिन देखी गुनासो बढ्न थालेका छन् । यस्ता क्रियाकलापको समाचार संकलनको क्रममा पत्रकारमाथि आक्रमण हुनु गलत भएको सिरहाका संचारकर्मीहरुले बताएका छन् ।क्लिनिक स्थापकसँग विरामीको गुनसो र अस्पतालले गर्न पाउने उपचार ईजाजतबारे जानकारी लिईरहँदा फोनमा अडियो रेकर्ड अन थियो। अस्पतालका संस्थापक मनोज साह र डा. दिलिप कुमारले कर्मचारी लगाएर आक्रमण गर्न लगाए पछि विरामीपक्षले नागरिककर्मी यादवलाई जोगाएको एक प्रत्यक्षदर्शीले जानकारी दिए ।घटनाको सत्यतथ्य छानविन गरी दोषीमाथि कार्वाहीको मांग गर्दै पत्रकार यादवलाई न्याय दिलाउन प्रेस चौतारी नेपाल सिरहा ।यता यस घटना बारे ईलाका प्रहरी कार्यलय लहानका डिएसपी राज कुमार केसी संग बुझ्दा घटनाको अनुशन्धान भैरहेको बताएका छन् ।

दिनेश्वर गुप्ता । लहान ३ मंसिर । भारतीय गुणस्तरहीन कृषि उत्पादनले नेपाली उत्पादनमा ठूलो समस्या पार्दै आएको छ । यसमा कृषि उत्पादन तरकारी, दाल, माछा, कुखुरालगायत दैनिक उपभोग्य मालसमान भारतबाट आयात हुंदा स्थानीय किसानहरुलाई मार्का परिरहेको बेला सयपत्री फूल उत्पादनमा समेत असर परेको छ । वैदेशिक रोजगारको प्रभावहीन गर्न सिरहाको धनगढीमा एक दर्जन नर्सरी संचालन रहेको छ । धनगढी १० मा विगत ८ बर्षदेखि नर्सरीसंगै सयपत्री फूल उत्पादन गर्दै आएका रामकुमार चौधरी भन्छन् — सयपत्री फूलबाट सिजनमा राम्रो कमाउंन सके पनि भारतबाट ठूलो मात्रा आयात हुने फूलले हाम्रो उत्पादन अलपत्रमा पर्छन् । सयपत्री फूलको बजार जनकपुर, विराटनगर र काठमाण्डौं रहेको छ । तर, काठमाण्डौंमा भारतीय सयपत्री फूल ठूलो मात्रामा आयात हुने गरेको कारण स्थानीय फूल त्यस बजारमा पुरयाउंन ढुवानी खर्चले समस्या गरेको छ । राम्रो बजार नपाएकोले रामकुमारले यस पटक ५ कठ्ठामा मात्र सयपत्री फूलको खेती गरेको छ । कम समयमा राम्रो आम्दानीको स्रोत रहेको, एक कठठमा लगाएको फूलबाट २५ हजारसम्म कमाई गर्छन् । असोजदेखि पुससम्म हुने यस सयपत्रीको खेती धनगढीमा पांच वटा नर्सरीले उत्पादन गर्दै आएको छ ।
करिब तीस बर्षदेखि नर्सरीमै जीवन विताएका श्रीदेव नर्सरीका श्रीदेव चौधरी भन्छन् — 'एक मिटर साईजको माला ३० देखि ४० रुपैयांमा बेच्दै आएको छु ।' 'यसको माग बढीत्तर जनकपुर रहेको छ ।'' काठमाण्डौं ठूलो बजार भएपनि भारतीय फूलले हामी मारमा परेको छु ।' तरकारी भन्दा फूल उत्पादन सजिलो भएपनि बजारको अभावमा उनीहरु ठूलो मात्रामा उत्पादन गर्न सकिरहेका छैन । बजार अभाव रहेपनि दशैं,दीपावली, विवाह वर्तबन्धन, धार्मिक अनुष्ठानलगायतको समयलाई पर्खेर फूल खेती गरिरहेका छन् । सिरहा जिल्लाभरी ४५ जति नर्सरी रहेपनि १० नर्सरीमा फूल उत्पादन हुंदै आएको छ । सिरहाको लहान, जिरोमाईल धनगढी, गोलबजारलगायतको नर्सरीमा फूल उत्पादन भइरहेको छ । फूल उत्पादनमा आत्मनिर्भर बनाउंन सरकारले बजारको व्यवस्थापन गरिदिएपछि भारतबाट आयात हुने करोडौंको फूल रोकिन सक्छन् । बजार राम्रो भए स्वदेशमै ठूलो मात्रामा फूल उत्पादन हुने सम्बन्धित कृषकहरुको कथन रहेको छ ।