रामभरोसी यादव,१२ मंसिर ।भारत सरकारले भारु पाँच सय र एक हजार दरका नोटमा प्रतिबन्ध लगाएपछि सीमा क्षेत्रका व्यवसायी र सर्वसाधारण मर्कामा परेका छन् । सीमाक्षेत्रका साना व्यवसायी र सर्वसाधारणले भारतीय आफन्तको प्रयोग गरी आफूसँग भएको रकम साटेको भएपनि पहुँच नभएकाहरु भने भारतीय दलालसँग आधा मूल्यमा भारु साट्न बाध्य भएका छन् ।
नाम उल्लेख नगर्ने सर्तमा सिरहाको चोहर्वाका एक व्यवसायीले आफूले आधा मूल्यमा भारु हजार र पाँचसयको नोट साटेको बताए ।
सिरहासँग सीमाना जोडिएका भारतीय बजारहरु जयनगर, लौकहा,
लदनीयाँ लगायतका बजारमा प्रतिबन्धित भारु आधा मूल्यमा साटिने गरेको सर्वसाधारणहरुले बताएका छन् ।घरायसी सामाग्रीहरु किनमेलका लागि भारत विहारको जयनगर पुगेका गोलबजार नपा–८ का वोयलाल यादवले भारु १ हजार साट्न परे त्यसको आधा र ५ सय साट्नु परेपनि आधा मूल्य दिइने गरेको बताए ।
तर, सिरहा गोलबजारका व्यवसायी विजय सिंहले भने आफूसँग भएको पाँच सयको २५ हजार रकम भारतीय आफन्तलाई जिम्मा लगाए । उनले भने, ‘कहिलेकाही इण्डियाजाँदा काम लाग्छ भनेर थोरै रकम जम्मा गरेर राखेको थिएँ । भारत सरकारले नोट प्रतिबन्ध लागाएपछि उतैका एकजना आफन्तलाई दिएर पठाएको छु ।’
आफन्त नभएका नेपालीको पाँच सय र हजारको नोट साट्न भने आधा मूल्यमा दलालकै भर पर्नुपर्ने अवस्था आएको हो ।
नेपाल राष्ट्र बैंकले सर्वसाधारणको भारु साट्नेबारे पहल गरिरहेको भएपनि भारतीय केन्द्रीय बैंकले हालसम्म जवाफ पठाएको छैन । भारतीय पक्षबाट जवाफ नआउँदा अन्योलमा परेका सर्वसाधारण आधा मूल्यमा रकम साट्न बाध्य भएका हुन् ।
यसैबीच लहानस्थित सगरमाथा चौधरी आँखा अस्पतालमा समेत भारु प्रतिबन्धको असर देखिएको छ । उपचारका लागि आउने धेरै भारतीय नै हुने भएकाले अस्पतालमा विरामीको चाप ह्वात्तै घटेको छ । जसका कारण अस्पतालले ठूलो आर्थिक नोक्सानी वेहोर्नु परेको छ ।
आँखा उपचारकालागि आउने विरामी सधैंजसो भिडभाड रहने अस्पताल पच्छिलो तीन सातादेखि सुुनसानको जस्तै देखिन्छ । भारतीय नोट प्रतिबन्ध लागाउनुभन्दा अघिल्लो दिनसम्म प्रत्येक दिन एक हजार २ सय सम्म बिरामीको जाँच गरिरहेको अस्पतालमा अहिले पाँच सयमा झरेको अस्पताल प्रशासकीय अधिकृत अभिषेक रोशनले जानकारी दिए ।
दैनिक एक हजार देखि देखि एक हजार दुईसयको हाराहारीमा उपचार सेवा लिन आउने विरामीको संख्यामा अहिले पाँच सयको हाराहारीमा झरेको छ । भारत सरकारले कात्तिक २३ गते रातीबाट पाँच सय र हजारको नोटमा प्रतिवन्ध लगाएको हो ।
No comments:
Post a Comment