राम नारायण पंडित, सिरहा,२९ साउन । प्रेस सेन्टर नेपाल सिरहाको जिल्ला एकता भेला तथा अधिबेशन आज सम्पन्न भएको छ । भेलाले पत्रकार आशिष विश्वकर्माको अध्यक्षतामा १५ सदस्यीय जिल्ला कार्य समिति गठन गरिएको छ । समितिको उपाध्यक्षमा प्रकाश योञ्जन, सन्तोष कुमार साह, मुकेश यादब,सचिबमा रामभरोसी यादब, सहसचिब संजय चौधरी र सदस्यहरुमा राम नारायण पंडित, महेश प्रसाद चौधरी, महेश सिंह लगायतका रहेका छन् । नेकपा माओबादी केन्द्रका पोलिटब्युरो सदस्य हरिनारायण चौधरीको प्रमुख आतिथ्य तथा राम नारायण सिंहको बिशिष्ट आतिथ्य र पत्रकार मणि विश्वकर्माको आतिथ्यमा भेला सम्पन्न भएको छ । नव गठित कार्य समितिलाई नेपाल पत्रकार महासंघ सिरहा शाखाका सभापति देब कुमार यादबले बधाई तथा कार्यकालको शुभकामना दिएका छन् ।

ऑनलाइन सिरहा डटकम साउन २८ । राष्ट्र निर्माणमा योगदान पु¥याएका विभिन्न क्षेत्रका युवा व्यक्ति तथा तिनका संस्थालाई सरकारले 'राष्ट्रिय युवा प्रतिभा सम्मान'द्वारा सम्मान गरेको छ । यहाँ आज आयोजित कार्यक्रममा राष्ट्रपति विद्यादेवी भण्डारी, युवा तथा खेलकुदमन्त्री दलजित श्रीपाइलीलगायतले २० व्यक्ति तथा संस्थालाई नगदसहित सम्मान गरे । अन्तर्राष्ट्रिय युवा दिवसको सन्दर्भ पारेर राष्ट्रिय युवा परिषद्ले आयोजना गरेको कार्यक्रममा सम्मानित हुनेमा समाजसेवा क्षेत्रका लागि हास्य कलाकार जोडी सीताराम कट्टेल 'धुर्मुस' र कुञ्जना घिमिरे जोडीको धुर्मुस–सुन्तली फाउन्डेसन, व्यावसायिक कृषिबाट गुल्मीको पैँचो पसल प्रालि, वातावरण तथा सरसफाइका लागि खाँदबारी, सङ्खुवासभाका डा राजु अधिकारी छन् । चित्रकला र सङ्गीतका लागि अपाङ्गता भएका अमीर लामा, कला र सङ्गीतका लागि शिव परियार, कृषि (फलफूल)का लागि ओखलढुङ्गाका लोचन बस्नेत, चेलीबेटी बेचबिखन नियन्त्रणका लागि माइती नेपालकी फूलमाया तामाङ छन् । त्यसैगरी कृषि (पशुपालन)का लागि हाल पोखराका व्यवसायी मकवानपुर निवासी दीपक तिमिल्सिना, कला र संस्कृतिका लागि 'कालोपोथी' चलचित्रका निर्देशक मीनबहादुर भाम, वैज्ञानिक खोज–अनुसन्धानका लागि काभे्रपलाञ्चोककी डा सुमन सत्याल छन् । साथै खेलकुद विधामा १० जनालाई सम्मान गरिएको छ । जसमा उसुकी निमा घर्ती मगर, जुडोकी फूपूल्हामु खत्री, फुटबलर नवयुग श्रेष्ठ, पारा खेलकुद प्रशिक्षक कुमार पौडेल, युवा क्रिकेटर सन्दीप लामिछाने, एथ्लेटिक्स खेलाडी विपना परियार, पौडीवाज गौरिका सिंह, खोखोका मुख्य प्रशिक्षक रामनारायण राय, तेक्वान्दो खेलाडी निशा रावल र नेपाल ट्राइथलन सङ्घ छन् । पुरस्कृत सबैले जनही रु एक लाख प्राप्त गरे । सो अवसरमा राष्ट्रपति भण्डारीले राष्ट्रिय युवा नीति र 'युथ भिजन–२०२५' एक वर्षभित्र लागू गर्नुपर्ने बताउँदै स्वदेशमै रोजगारी सिर्जना गर्न युवासम्बन्धी थप ठोस कार्यक्रम ल्याउनुपर्नेमा जोड दिनुभयो । देश विकासमा युवा परिचालन गर्न आग्रह गर्दै उनले भने – "युवा शक्ति पलायन रोक्न सबै वर्ग र समुदायका युवालाई उपर्युक्त प्राविधिक र जीवनोपयोगी शिक्षा दिँदै स्वदेशमै रोजगारी सिर्जना गराउनुपर्छ ।" राष्ट्रिय युवा परिषद्का अध्यक्षसमेत रहनुभएका मन्त्री श्रीपाइलीले युवा विकासकोे १० वर्षे योजना (युथ भिजन–२५)सँगै ल्याइएका अन्य सबै नीति, कार्यक्रम तथा योजना कार्यान्वयन गर्ने प्रतिबद्धता जनाउँदै भने – "अब युवाका क्षेत्रमा सरकारले लगानी बढाउनेछ ।" कार्यक्रममा युवा परिषद्का उपाध्यक्ष माधव ढुङ्गेलले करिब ४० लाख युवालाई स्वदेशमै रोजगारी दिने योजनाअनुरुप आफूहरु काम गरिरहेको बताए ।