ऑनलाइन सिरहा डटकम जेठ ३० । नयाँ शक्ति नेपालको पार्टी घोषणा कार्यक्रममा अभिनेत्री समेत रहेकी करिश्मा मानन्धरले नेपाली कांग्रेसका केन्द्रीय सदस्य एवम् सांसद प्रदीप गिरीका विषयमा अन्टसन्ट बोलेपछि दशरथ रङ्गशाला एकछिन् तात्तिएको छ । उद्घोषक करिश्माले प्रदीप गिरीको नाम शुद्धसँग उच्चारण गर्न नजानेपछि प्रदीपले मञ्चबाटै करिश्मालाई 'उद्घोषक सुन्दरी'को संज्ञा दिएका थिए । प्रदीप गिरीले अगाडि भने, 'उद्घोषक सुन्दरीले भने जस्तो म भट्टराई वा डाक्टर कोही पनि होइन । मेरो परिचय यत्ति नै हो ।' करिश्मा मानन्धरले उद्घोषणका क्रममा नाम चलेका शीर्ष नेताहरुको नामै राम्रोसँग उच्चारण गर्न सकेकी थिइनन् । प्रदीप गिरीले आलोचना गरेपछि करिश्माले भनिन्, 'म अलि छिटो बोल्ने गरेकी छु, त्यही भएर गल्ती हुने गरेको छ । अबदेखि म सुध्रिने प्रयास गर्ने छु, सर ।' उद्घोषणका क्रममा करिश्माले धेरै नै बिगारेपछि पाशाङ शेर्पा आएर केही सुधारको प्रयास गरेका थिए । यतिसम्मकी करिश्माले उद्घोषका क्रममा प्रधानमन्त्रीलाई 'केपीजी' साढे तीन बजे आउँदै हुनुहुन्छ भनेर सभालाई जानकारी दिएकी थिइन् । तर, उनले मुलुकको प्रधानमन्त्रीको पूरा नाम लिने हिम्मत गरिनन् । कार्यक्रम विगार्दै गएकी करिश्माले शेरबहादुर देउवाका विषयमा पनि अन्टसन्ट बोलेकी थिइन । करिश्माले भनिन्, 'शेरबहादुर दाईसँग पनि राम्रो छ । आरजु भाउजुसँग पनि राम्रो छ । रातो साडीमा रहेकी करिश्माको यस्तो कार्यको सबैले अलोचना गरेका छन् । प्रधानमन्त्रीको नाम सम्मानका साथ लिन नसक्नेले कसरी राजनीति गर्ने हो भनेर टिकाटिप्पणी गरेका छन् । नयाँ शक्ति नेपालको घोषणा सभामा गायक रामकृष्ण ढकालले गीत गाएर मनोरञ्जन दिएका छन् । उनी घोषणा सभामा पैसा लिएर गाएका हुन् वा नयाँ शक्तिको सदस्य भएर गाएका हुन् त्यसबारेमा भने करिश्माले केही बताइनन् ।