कतारबाट नेपालमा टेलिकमको मोबाइलमा सस्तो दरमा कल गर्न सकिने

काठमाडौं, ८ असोज ।
बडादशैंको अवसरमा कतारको ओरेडु कम्पनीको प्रिपेड मोबाइलबाट नेपाल टेलिकमद्वारा वितरित कुनै पनि टेलिफोन नम्बरमा हालसम्मकै सबैभन्दा सस्तो दरमा कल गर्न सकिने व्यवस्था गरिएको छ ।

जस मार्फत कतारको ओरेडु कम्पनीको प्रिपेड मोबाइलबाट नेपाल टेलिकमद्वारा वितरित कुनै पनि टेलिफोन नम्बरमा कल गर्दा प्रतिमिनेट २० दिरहाम अर्थात करिब ५ रुपैयाँ ७५ पैसा मात्र महसुल लाग्ने टेलिकमद्धारा जारी विज्ञप्तीमा उल्लेख गरिएको छ ।

उक्त अफर सेप्टेम्बर २५ (असोज ८, २०७२) देखि आगामी अक्टोबर २४ तारिख (कात्तिक ७, २०७२) सम्म लागू हुने टेलिकमले जनाएको छ ।

टेलिकमका प्रवक्ता प्रतिभा वैद्यका अनुसार नेपाल टेलिकमको विशेष अनुरोधमा नेपालीहरुको महान् चाड बडादसैंलाई लक्षित गरी ओरेडु कम्पनीले उक्त अफर लागू गरेको हो ।

यस छुट अफरबाट कतारमा कार्यरत करिब ७ लाख नेपालीलगायत अन्य उपभोक्ताहरु पनि लाभान्वित हुने टेलिकमले दावी गरेको छ ।

अफर नहुँदा कतारबाट नेपाल टेलिकमको नम्बरमा कल गर्दा सामान्य दर प्रतिमिनेट ४५ दिरहाम अर्थात करिब १३ रुपैयाँ रहंदै आएको छ ।

नेपालबाट कतारमा कल गर्दा भने हाल प्रतिमिनेट १२ रुपैयाँ महसुल लाग्छ ।